Қазақстан бидай мен ұн экспортына квотаны ұзартады

Қазақстан бидай мен ұн экспортына квотаны 30 қыркүйекке дейін ұзартады. Бұл туралы ауыл шаруашылығы министрлігі хабарлады.

Сыртқы сауда саясаты және халықаралық экономикалық ұйымдарға қатысу жөніндегі ведомствоаралық комиссия республиканың азық-түлік қауіпсіздігін қамтамасыз ету мақсатында биылғы жылдың 30 қыркүйегіне дейін үшінші елдерге және ЕАЭО елдеріне 550 мың тонна көлемінде бидай мен меслин, сонымен қатар үшінші елдерге 370 мың тонна көлемінде бидай мен бидай-қара бидай ұнының экспортына шектеу енгізу туралы шешім қабылдады, — делінген хабарламада.

Министрлік ауыл шаруашылығы өнімдерін квоталау механизмін бекіту бойынша шаралар қабылдап жатыр.

15 маусымға дейін Қазақстаннан 1 миллион тонна бидай мен 300 мың тонна мөлшерінде ұнды сыртқа шығаруға квота енгізілген болатын. Қазақстанның астық одағының соңғы мәліметіне сәйкес, бидайға арналған квотаны игеру 50%, ұн бойынша 87% құрап отыр.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз