Қысқаметражды фильм түсірумен айналысатын бірлестіктің биылғы таңдауы жанры жағынан бір-біріне ұқсамайтын жеті сценарийге түсті. Е.Бораншының «Жетім бұрыш», Баймұрат Жұмановтың «Жесткий тип», А.Әуелбектің «Миша», А.Байракимовтің «На грани», А.Мұсатаевтың «Хат», Д.Махмұттың «Таксист» және Е.Рақымбековтің «Эль Фриман» фильмдері жақын арада көрерменге жол тартпақ.
Қазіргі уақытта барлық фильмдердің түсірілімі аяқталып, монтаждау кезеңіне өткен. Жеті фильм де Мәдениет және спорт министрлігінің тапсырысы бойынша түсірілген.
Ш.Айманов атындағы «Қазақфильм» АҚ президенті Бақыт Қайырбеков қысқа нұсқадағы жаңа туындылардың түсірілуін ең алдымен жаңа есімдердің жарыққа шығуымен байланыстырды.
Бақыт Қайырбеков: «Қазақфильмнің» негізгі мақсаттарының бірі – жас кинематографистерге қолдау көрсету. Осы орайда, біз жыл сайын алты-жеті жас талапкерге тырнақалды фильмдерін түсіруге мүмкіндік береміз. Бұл мүмкіндік тек режиссерлерге ғана емес, сондай-ақ, басқа да жас кино мамандарына беріледі. Қазақ киносының келешегі осы жастардың қолында, сондықтан да оларға кино өнеріне жол ашу қажет», – деді.
