Ақорданың хабарлауынша, министр мемлекет басшысына еліміздегі криминогендік жағдай, ішкі істер органдарының биылғы атқарған жұмыстарының нәтижелері туралы мәлімдеді.
Елімізде қылмыстық істердің азаюы бойынша оң үрдіс байқалады (5% төмендеген). Бұл ретте кісі өлтіру 15%, тонау және бұзақылық 20% аз тіркелген. Қоғамдық орындар мен көшелердегі қауіпсіздік деңгейі жоғарылады.
Ерлан Тұрғымбаев президентке тапсырмаларының орындалуы жөнінде, атап айтқанда есірткі қылмысына қарсы іс-қимыл, тұрмыстық зорлық-зомбылықтың алдын алу және балаларды қылмыстық қол сұғушылықтан қорғау, жол қауіпсіздігін қамтамасыз ету, қос азаматтық фактілерінің жолын кесу үшін қабылданып жатқан шаралар туралы баяндады.
Бұдан бөлек Ерлан Тұрғымбаев Қасым-Жомарт Тоқаевқа полиция жұмысының сервистік моделіне көшу, «жақын жердегі полиция» қағидатын қамтамасыз ету, учаскелік инспекторлардың қызметін реформалау және құқық бұзушылықтың алдын алу саласындағы олардың өкілеттіктерін кеңейту жөнінде атқарылып жатқан жұмыстар туралы есеп берді.
Министр сонымен бірге президентке ішкі істер органдарын цифрландыру барысы, полиция учаскелері мен қылмыстық-атқару жүйесінің мекемелерінде жаппай бейнебақылау құрылғыларын орнату, автоматтандыру және халыққа көрсетілетін мемлекеттік қызмет үдерістерін жеңілдету жайында баяндады.
Мемлекет басшысы ішкі істер органдарының қызметіне оң баға беріп, азаматтардың конституциялық құқығын қорғауға, қоғамдық тәртіпті сақтауға және жол қауіпсіздігін қамтамасыз етуге бағытталған қосымша шаралар қабылдауға тапсырма берді.