Бұл туралы Алматы әкімі Бақытжан Сағынтаев Орталық коммуникациялар қызметінде өткен брифингіде айтты.
«Алматы жастары» бағдарламасын бастаған кезде бір жылда тоқтатамыз деп жоспарлаған жоқпыз. 14 миллиард теңгеден бастадық: біз 10 миллиард теңге бердік, «Отбасы банк» 4 миллиард теңге берді. Биыл баға қымбаттағаннан кейін оны 18 миллиардқа көтердік: 14 миллиард теңге әкімшілік және 4 миллиард теңгені «Отбасы банк» берді, — деді қала әкімі.
Қала әкімі бағдарламаның тиімді тұсы ретінде жастарға пәтерді қаланың кез келген жерінен алу мүмкіндігі берілгенін атап өтті.
Былтыр жастар 1 000 пәтер алды, оның ішінде 300 мұғалім, 300 дәрігер, спортшылар, журналистер мен ғылым, мәдениет саласының қызметкерлері бар. Биыл да 1 000 адам баспаналы болды. Келесі жылы да бұл бағдарлама жалғасын табады, өте үлкен сұранысқа ие, — деді Алматы әкімі.
Еске салайық, «Алматы жастары» бағдарламасына қатысушылардың жасы 35-тен аспауға тиіс, бағдарламаға өтініш беруші мен оның отбасы мүшелерінде меншік құқығында тұрғын үй болмауы керек.