Биыл докторантураға түсу емтиханы қалай өтеді?

Әділет Тойбаевтың айтуынша, биыл докторантураға түсу ережесіне өзгерістер енгізілді.

Оның ішінде түсу емтиханы жаңа форматта өтеді. Докторантураға құжаттар жоғары оқу орындарының қабылдау комиссиялары арқылы Ұлттық тестілеу орталығының сайтында қабылданады. Енді түсушілер түсу емтихандарын өңірлік тестілеу орталықтарында компьютермен тапсырады. Келесі күні емтихан қорытындысы шыққаннан кейін нәтижесімен келіспеген жағдайда түсуші аппеляцияға өтініш бере алады, — деді ол.

Департамент басшысы докторантураға түскен білім беру гранты иегерлерінің тізімі ЖОО сайттарында жарияланатынын айтты.

Докторантураға түсуші тіркелу барысында жеке мәліметтерін толтырып, түсу жоспарланған бір білім беру бағдарламасын және 1 жоғары оқу орнын таңдайды. Емтиханды өткізу уақыты мен орны түсу емтиханы басталғанға дейін Ұлттық тестілеу орталығының сайтында жарияланады. Докторантураға түсу емтиханы эссе жазудан — 20 балл, оқуға дайындығын анықтауға арналған тесттен – 30 балл және бейінді білім беру бағдарламасы бойынша сұрақтарға жауап беру 50 балдан тұрады. Қорытынды баға аталған бөлімдер балының қорытындысымен бағаланды, — деді Әділет Тойбаев.