Басты бетЖаңалықтарҚасым-Жомарт Тоқаев: Неміс кәсіпкерлеріне ерекше жағдай жасаймыз
Қасым-Жомарт Тоқаев: Неміс кәсіпкерлеріне ерекше жағдай жасаймыз
Қазақстан Президенті Германияның CLAAS Group, Linde AG, Schaeffler Group, Siemens Healthineers және басқа да 20-дан астам компаниясының басшысымен кездесіп, оларды Қазақстан нарығына шақырды.
Мемлекет басшысы Берлинге сапары барысында неміс бизнесінің өкілдерімен кездесті.
Ақорданың баспасөз қызметінің хабарлауынша, CLAAS Group компаниясы бақылау кеңесінің төрағасы Катрина Клаас-Мюльхойзермен кездесу барысында бірлескен инвестициялық жобаларды жүзеге асыру мәселелері талқыланды. CLAAS Group компаниясы Қазақстанға CT Agro дистрибьютор желісі арқылы ауыл шаруашылығы техникаларын әкеліп, сервис қызметін көрсетумен айналысады.
Біздің негізгі стратегиямыз — елімізге тартылатын инвестицияларды әртараптандыру. Инвестиция тұрғысынан Германияның негізгі стратегиялық серіктесі болғымыз келеді, — деді Қасым-Жомарт Тоқаев.
Катрина Клаас-Мюльхойзер Қазақстанның ірі компаниялармен ғана емес, орта деңгейдегі компаниялармен де ынтымақтастық орнатуға ниетті екеніне ризашылық білдірді.
Фото: Аkorda.kz
Linde AG компаниясының атқарушы вице-президенті Кристиан Брухпен кездесу барысында кәсіпорынның Қазақстанда жүзеге асырып жатқан инвестициялық жобалары мен жоспарлары туралы сөз болды.
Канцлер Ангела Меркельмен және Президент Франк-Вальтер Штайнмайермен жүргізілген бүгінгі келіссөздер жоғары деңгейде өтті. Осы келіссөздер екіжақты ынтымақтастықты дамытуға тың серпін беретініне сенімдімін, — деді Мемлекет басшысы.
Кристиан Брух өз компаниясының 2013 жылы «Арселор Миттал Теміртау» АҚ базасында техникалық газ өндіру жобасын іске асырғанын және оған 95 миллион евро көлемінде инвестиция салғанын айтты.
Бүгінде Linde AG компаниясы жобаның екінші кезеңін қолға алды. Жаңа жобаға шамамен 80 миллион еуро инвестиция салуға ниеттіміз, — деді Кристиан Брух.
Неміс компаниясы «ҚазМұнайГаз» ҰК» АҚ Жаңаөзенде газ өңдеу зауытын салу жөнінде келіссөздер жүргізіп жатқанын айтты.
Фото: Аkorda.kz
Қасым-Жомарт Тоқаев Schaeffler Group компаниясының бас директоры Клаус Розенфельдпен кездесу кезінде өзара ынтымақтастықтың перспективаларын талқылады. Автомобиль жасау, өнеркәсіп және ғарыш салалары бойынша қосалқы бөлшектер шығаратын кәсіпорын басшысы Клаус Розенфельд Қазақстан Презиентіне өндіріс пен инвестиция мүмкіндіктері туралы мәлімет берді.
Siemens Healthineers компаниясының бас директоры Бернд Монтаг Мемлекет басшысына мемлекеттік-жекеменшік әріптестік негізінде салынатын онкология орталығының жобасын ұсынды. Кәсіпорын басшысы еліміздің өндіріс әлеуетін арттыруға септігін тигізетін ұзақмерзімді ынтымақтастық орнатуға ниетті екенін айтты.
Қасым-Жомарт Тоқаев бұдан соң немістің жетекші компаниялары өкілдеріне арналған іскерлік дастархан басында Қазақстанның экономикалық және инвестициялық әлеуеті туралы әңгімеледі.
Қазақстан Президенті ретінде Германиядан елімізге инвестиция мен кәсіпкерлерді тартуға және бизнес өкілдерінің Қазақстанда өзін қауіпсіз сезініп, табысты дамуы үшін бар күш-жігерімді жұмсаймын. Біз неміс кәсіпкерлері үшін ерекше жағдай жасауға дайынбыз, — деді Мемлекет басшысы.
Президент Қазақстанның өз стандарттарын жақсартуға, болашақта Экономикалық ынтымақтастық және даму ұйымының толыққанды мүшесі болу үшін заңнамаларды осы ұйым деңгейіне дейін көтеруге ұмтылатынын мәлімдеді. Сонымен қатар Қасым-Жомарт Тоқаев Қазақстанның қолайлы географиялық жағдайы мен орнықты сыртқы экономикалық саясаты шетелдік инвесторлар үшін зор мүмкіндіктерге жол ашатынына назар аударды.
Қытаймен, Ресеймен және Орталық Азия елдерімен қарым-қатынасымыз өте жақсы. Біз Шығыс пен Батыс арасындағы маңызды көлік хабымыз. Трансконтинентал бағыттағы барлық жолдың 70%-і Қазақстан арқылы өтеді. Халықаралық «Батыс Еуропа — Батыс Қытай» дәлізі жүк тасымалына кететін уақытты қысқартуға мүмкіндік береді. Биыл Қытайдың Сиань қаласынан Германияға тасымалданатын жүк небәрі он күнде жеткізіліп, ректорд көрсеткішке жетті, — деді Президент.
Оның айтуынша, немістің Volkswagen, Mann, Siemens, Knauf, Bayer, METRO сияқты жетекші концерндері Қазақстанда белсенді жұмыс істеп жатыр. Heidelberg Cement және Linde Group корпорациялары ел экономикасына ірі көлемде қаржы құйып, табысты экономикалық ынтымақтастықтың жарқын мысалы болып отыр.
Қасым-Жомарт Тоқаев неміс кәсіпкерлерін агроөнеркәсіп кешені, жоғары технологиялар мен цифрландыру салаларындағы жобаларды жүзеге асыруға және «Астана» халықаралық қаржы орталығының жұмысына атсалысуға шақырды.
Іскерлік дастархан басына барлығы 20-дан астам компанияның жетекшісі жиналды. Олардың арасында WILO, CLAAS Group, SMS Holding GmbH, Schaeffler AG, Airbus Defence and Space, Linde AG, Mangold Consulting GmbH, Herrenknecht AG, Knorr-Bremse AG, Euler Hermes, Siemens Healthineers, John Deere, Deutsche Bank AG, Tönnies Holding, BAUER COMP Holding және басқалары бар.
Неміс іскер топтарының өкілдері Қазақстан нарығында жұмыс істеу тәжірибесі туралы және жоспарлары мен ұсыныс-тілектерін айтты.
Бүгінгі сапарыңыз саяси қатынастарымызға ғана емес, экономикалық байланыстарымызға да оң ықпал ететініне сенімдіміз. Қазақстан үшін Германия бизнесі сенімді серіктес екеніне сендіремін. Болашақ ынтымақтастығымыз бен Қазақстан экономикасындағы неміс инвестициясын арттыру үшін бізге зор мүмкіндіктер ашылады деп есептеймін, — деді WILO компаниясының басшысы Оливер Гермес.
Қасым-Жомарт Тоқаев Қазақстан инвестиция жобаларын неміс бизнесінің қатысуымен жүзеге асыру үшін ынтымақтастық орнатуға дайын екенін мәлімдеді.
Біз барлық мәселенің оң шешілуіне көмектесуге мүдделіміз. Бүгінгі баяндамаларыңызда айтылған жобалар Үкіметіміздің ерекше назарында болады. Қазақстанда бизнестеріңіз жүзеге асырып жатқан бірлескен жобаларға қолдау көрсетуге баса мән береміз, — деді Мемлекет басшысы.
Еске салайық, Қасым-Жомарт Тоқаев Германияға ресми сапар жасады. Ол Германия канцлері Ангела Меркельмен, Германия Президенті Франк-Вальтер Штайнмайермен, Германияның экс-канцлері Герхард Шредермен және БАҚ өкілдерімен кездесті.
