Қазақстан Президентінің жаңа көмекшісі тағайындалды. Бұл туралы Ақорданың баспасөз қызметі хабарлады.
Ерұлан Кенжебекұлы Жамаубаев Қазақстан Республикасы Президентінің көмекшісі болып тағайындалсын, — делінген Президенттің жарлығында.
Сонымен бірге бүгін Мемлекет басшысының өкімімен Ерұлан Жамаубаев Президент Әкімшілігінің әлеуметтік-экономикалық мониторинг бөлімінің меңгерушісі қызметінен босатылды.
Ерұлан Жамаубаев 1974 жылы 25 наурызда дүниеге келген. 1995 жылы Қазақ мемлекеттік басқару академиясын, 2009 жылы Т.Рысқұлов атындағы қазақ экономикалық университетінің бизнес-мектебін бітірген.
1996-98 жылдары Қазақ мемлекеттік басқару академиясының оқытушысы, 1998-2006 жылдары ҚР Ұлттық банкі зерттеулер және статистика департаментінің жетекші аналитигі, бас аналитигі, бас маман-аналитигі, басқарма басшысы және директорының орынбасары болды.
2006-2014 жылдары ҚР Ұлттық банкінің үйлестіру департаментінің директоры, 2014-2015 жылдары «Қазақстанның тұрғын үй құрылыс жинақ банкі» АҚ басқарушы директоры, 2015 жылдың шілдесінен қарашасына дейін ҚР Президенті Әкімшілігінің әлеуметтік-экономикалық мониторинг бөлімі меңгерушісінің орынбасары қызметтерін атқарды.
2015 жылдың қарашасында Президент Әкімшілігінің әлеуметтік-экономикалық мониторинг бөлімінің меңгерушісі қызметіне тағайындалды.