Қазақстандықтар биыл жөндеу қызметтеріне 18 миллиард теңге жұмсады

Қазақстандықтардың қандай бұйымдарды көп жөндететіні белгілі болды.

Қазақстандықтар биылғы бірінші жартыжылдықта компьютер, жеке бұйымдар, тұрмыс техникасын жөндеу қызметтеріне 17,7 миллиард теңге төлеген, бұл былтырғы жартыжылдықпен салыстырғанда 25%-ға жоғары. Бұл туралы Еnergyprom.kz зерттеуінде айтылады.

Мұндай қызмет көрсету саласы бойынша ең жоғарғы өсім Атырау облысында байқалды — 2017 жылдың алғашқы жартысымен салыстырғанда 2,6 есе көп. Бұл салада қызмет көлемінің өсуі жөнінен Атырау өңірінен кейінгі орындарда Астана (былтырмен салыстырғанда 79%-ға жоғары) мен Ақмола облысы (56,5%) тұр.

Жөндеу қызметтеріне Алматы тұрғындары республика бойынша көп қаржы жұмсаған — 8,4 миллиард теңге, бұл былтырмен салыстырғанда 19,2%-ға жоғары. Республика бойынша компьютер, жеке бұйымдар мен тұрмыс техникасын жөндеуге жұмсалған қаражаттың 47,6%-ы алматылықтарға тиесілі. Астаналықтар 2,8 миллиард теңге жұмсаған, бұл — республика бойынша жұмсалған қаражаттың 15,8%-ы. Қарағанды тұрғындары жөндеу қызметтеріне 1,2 миллиард теңге шығындаған (республика бойынша жұмсалған шығынның 6,5%-ы).

Қазақстандықтар көбіне мына бұйымдарды көп жөндетеді:

  1. Компьютер және периферия жабдықтары (тышқан, тачпад, экран, микрофон, сканер, тағы басқа). Биылғы жартыжылдықта мұндай заттарды жөндеуге 9,4 миллиард теңге жұмсалған, былтырмен салыстырғанда жұмсалған қаражат көлемі 32,2%-ға көп.
  2. Тұрмыс электроникасы. Жұмсалған қаражат көлемі — 2,5 миллиард теңге, былтырмен салыстырғанда 5%-ға ғана аз.
  3. Тігін бұйымдары, баскиім, текстиль галантереясы. Биыл қазақстандықтар мұндай қызметтерге 1,7 миллиард теңге — былтырмен салыстырғанда 40,7%-ға көп қаражат жұмсаған.

Қыркүйек айының қорытындысына қарағанда тұрмыс техникасы арасынан тоңазытқыш жөндеу қызметінің бағасы 5,7%-ға жоғарылаған. Кіржуғыш машинаны жөндеу 5,2%-ға, теледидардың ақауын тексеру 3,6%-ға қымбаттады. Қабырға және үстел сағаттарының қуат көзін ауыстыру құны 2,3%-ға жоғарылады. Былтырмен салыстырғанда ерлер аяқкиімін жөндеу шеберлерінің жұмысы 6,7%-ға, әйелдер аяқкиімін жөндеу 5,3%-ға қымбаттап отыр.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз