Астанада 1000-ға жуық медбикенің жалақысы көтеріледі

Астанада жыл соңына дейін 48 медициналық учаске ашылады.

Астана әкімдігі
Фото: astana.gov.kz

Медициналық жәрдемді дамыту мен медицина қызметкерлерінің өмірін жақсарту – басым бағыттардың бірі. Бұл туралы Астана әкімінің орынбасары Ермек Аманшаев Президент Жолдауын халыққа түсіндіру барысында айтты.

588 учаскелік дәрігер мен 1000-ға жуық медбикенің жалақысы көбейеді. Сонымен қатар оларды жұмыстың жаңа әдісімен оқытуды 2019 жылдың соңына дейін 100% жеткізу жоспарланды. Бұл медициналық жәрдемнің сапасын жақсартып, асқынулардың және негізгі ауруларды госпитализациялаудың санын азайтады, сонымен бірге балалар мен жүкті әйелдердің патронажын сапалы етеді, – деді Ермек Аманшаев.

Бұдан бөлек, “Үй жанындағы дәрігер” мемлекеттік-жекеменшік әріптестік шеңберінде “Жағалау”, “Триумфальная арка”, “Айнакөл”, “Өндіріс” тұрғын үй кешендерінің аумағынан және “Интернациональный” кентінен 5 емхана ашу жоспарланып отыр.

Бұл емханаға кезекке тұруды жеңілдетеді және де жалпы практикадағы дәрігерге қаралатын 1700-1800 адамның жүктемесін төмендетіп, көрсетілетін қызметтің сапасын айтарлықтай жақсарта түседі, – деді қала әкімінің орынбасары.

Оның айтуынша, жыл соңына дейін 48 медициналық учаске ашу жоспарланып отыр. Сонымен қатар алғашқы медициналық санитарлық көмек азаматтарға қолжетімді бола түседі.