Финалда Данияр өзбек боксшысы Шахрам Гиясовты таза жеңді. Осылайша, Қазақстан құрамасы бокстан Риодағы алғашқы алтынын алды.
Отандасымыз финалда өзбек боксшысы Шахрам Гиясовты жеңді. Жартылай финалда жарақат алған қазақстандық боксшы қорғана жүріп жұдырықтасатынын алғашқы минуттардан байқатты. Қарсыласын оңтайы келгенде осал тұсын табуға ұмтылды. Өзбек боксшысы бірінші нөмірмен жұдырықтасып, шабуылға қанша шыққанмен, Даниярдың қарымта соққылары қауқарлы шықты.
Жартылай финалда Елеусінов жарақат алып қалған болатын. Оның үстіне, өзбек боксшысы да өте лас жұдырықтасып, мейілінше Даниярды жарақаттауға тырысты десек артық емес.
Данияр, “69 келі – қазақтың салмағы” деген игі дәстүрді жалғастырды. Еске сала кетсек, 2004 жылы Афины олимпиадасында Бақтияр Артаев, 2008 жылы Пекин олимпиадасында Бақыт Сәрсекбаев, 2012 жылы Лондон олимпиадасында Серік Сәпиев осы салмақта олимпиада алтынын еншілеген еді.
Бұған дейін 91 келі салмақта бокстасқан Василий Левит олимпиада ойындарының күміс жүлдегері атанған еді.
Әйтсе де, қазақ халқы үшін өте маңызды кездесуде бар күшін салып, алтын жүлде жеңіп алды.
Сұрақ-Жауап сайты барша қазақстандық жанкүйерлерді алтын медальмен құттықтайды.
12 Пікір