Нұрсұлтан Назарбаев Жоғарғы сот төрағасы Жақып Асановты қабылдады. Бұл туралы Ақорданың баспасөз қызметі хабарлады.
Кездесуде Мемлекет басшысына сот төрелігі органдарының биылғы жартыжылдықта атқарған қызметі мен бұған дейінгі жүктелген тапсырмалардың орындалу барысы жөнінде есеп берілді.
«Өткен 6 айдың ішінде бірінші сатыдағы соттар 1,8 миллион сот ісі мен материалдарды қарады. Бұл былтырғы осы уақыттағы көрсеткіштен жоғары. Қылмыстық іс бойынша 16 302 адам сотталса, олардың 25%-ы бас бостандығынан айырылды», – деді Жоғарғы сот төрағасы.
Жақып Асанов Нұрсұлтан Назарбаевқа экономикалық қылмыстар бойынша қамау түріндегі бұлтартпау шараларын белгілеу жағдайы 30%-ға төмендегінін мәлімдеді.
Кездесу соңында Қазақстан Президенті Жоғарғы сот төрағасына бірқатар тапсырма берді.
