Нұрсұлтан Назарбаев Алматы облысына жұмыс сапарымен барды

Нұрсұлтан Назарбаев Алматы облысының Үшарал қаласының жаңа әуежай қызметімен және облыстың шағын авиация саласын дамыту перспективаларымен танысты.

«Соңғы төрт жылда облыста туристік қызмет көрсету көлемі екі есе артты. Бұл көрсеткіш 2014 жылы 3,9 миллиард теңгені құраса, 2017 жылы 8,3 миллиард теңгеге өсті. 2018 жылы мұны 10 миллиард теңгеге дейін жеткізуді жоспарлап отырмыз. Алакөл ауданында көрсетілген қызмет көлемі 2017 жылы 3,5 миллиард теңгеге жетіп, 2014 жылғы деңгеймен салыстырғанда 8 есе артты», — деді Алматы облысының әкімі Амандық Баталов.

Сондай-ақ, кеңесте «Қазақстан темір жолы» ҰК» АҚ президенті Қанат Алпысбаев Мемлекет басшысына Алакөл демалыс аймағының 2020 жылға дейінгі көліктік қолжетімді картасын таныстырып, транзиттік тасымалдау ісін дамыту стратегиясының іске асырылуы барысы жөнінде баяндады.

Мәдениет және спорт министрі Арыстанбек Мұхамедиұлы ішкі және сыртқа шығу туризмін дамыту үшін барлық кедергілерді алып тастау жолында Қазақстан халқына арналған Жолдауда айтылған тапсырмалардың іске асырылуы жөнінде баяндады.

«Еліміз туризмнің экономикалық әсерін іс жүзінде ЭКСПО-ны өткізу барысында сезінді. Сол кезде Қазақстанға 7 миллионнан астам турист келді. Бұл өткен жылмен салыстырғанда 18 пайызға көп. Ішкі туризм легі 20 пайызға артып, шамамен 6 миллион адамға жетті», — деді ол.

Жиын қорытындысы бойынша және туристік кластер нысандарын аралағаннан кейін Нұрсұлтан Назарбаев Қазақстанның туризм саласын одан әрі дамыту үшін орталық мемлекеттік және жергілікті ақтарушы органдарға бірқатар тапсырма берді.

«Алакөл Қазақстан бойынша ең көп демалушы баратын жерге айналуы керек. Ол ыңғайлы жерде орналасуымен ерекшеленіп, барлық өңірдің тұрғындары үшін қолжетімді болып отыр. Көлдің бірегейлігі суының емдік қасиетімен байланысты. Оның құрамында радон, сілті және басқа да пайдалы элементтер бар. Осыған байланысты Алакөл еліміздің туризм саласы үшін өте маңызды», — деді Нұрсұлтан Назарбаев.

ДереккөзInform.kz