Тамара Дүйсенова Қырғызстан президентінің Қазақстандағы зейнетақы жайлы пікіріне жауап берді

Еңбек және халықты әлеуметтік қорғау министрі Тамара Дүйсенова Қырғыстан президенті Алмазбек Атамбаевтың Қазақстандағы зейнетақы жайлы айтқан пікіріне жауап берді. 

Тамара Дүйсенова

Мұның алдында Қырғызстан президенті екі елдегі зейнетақы мөлшерін салыстырған болатын.

“Біз әрдайым қандай да бір мәселе болса да бір-бірімізге көмектесіп келгенбіз”, – деді министр Тамара Дүйсенова үкімет сағатының үзілісінде.

“Әлеуметтік төлемдер мен оның деңгейін салыстырсақ, бұл әрбір елдің жеке өз мәселесі. Бізде аз немесе көп деу – менің тарапымнан және өзге тараптан айту дұрыс емес. Зейнетақы мөлшерін айтсақ, бізде Қырғызстан азаматтарының алатын зейнетақысы қарағанда 2,6 есе көп. 1 қаңтардан тағы да өсіретінімізді білесіздер. 1 шілдеде базалық зейнетақы қайта қаралды, осыны ескерсек, келесі жылы бұл айырмашылық 3,5 есеге жетеді”, – деді Тамара Дүйсенова.

Еске сала кетейік, мұның алдында ҚР Сыртқы істер министрлігі Қырғызстан президенті Алмазбек Атамбаевтың айтқан сөзіне байланысты мәлімдеме жасаған еді.