Әр жәдігер – тұнған тарих. Сөйлетсең, сөз тиегі ағытылып, сыр шертуге дайын. Елбасының мақаласына сәйкес «Рухани қазына» бағдарламасы аясында «Қазақстанның киелі географиясы» жобасына облыстың 9 тарихи-мәдени орын алынды.
Осы орайда өңірдегі тарихшылар да туған өлкенің құндылықтарын дәріптеуді көздейді. Олар өскелең ұрпаққа әр нысан жайында нақты әрі толыққанды ақпарат қалдыруды мақсат етіп отыр.
«Байтақ дала – туған жердің, қымбат маған әр тасы» деп ақын Нұрсұлтан Әлімқұлов жырлағандай, әр адам өз өлкесіне асқан жанашырлық танытып, тарихын тануға құлшыныс білдіруі керек. Елбасының «Болашаққа бағдар: рухани жаңғыру» мақаласында айтылған «Туған жер» бағдарламасының басты мазмұны да осыған саяды.