Сайысты Батыс Қазақстан облысы жастар мәселелері басқармасының қолдауымен «Ақиқат» жастар қоғамдық бірлестігі ұйымдастырады.
Дельфийлік ойындардың басты мақсаты – дарынды жастарды өнерге баулу, олардың шығармашылық, орындаушылық қабілеттерін одан әрі шыңдау, рухани, адами құндылықтарды қалыптастыру, зиялылыққа тәрбиелеу. Конкурс бағдарламасына сәйкес, қатысушылар скрипка, фортепиано, баян, домбыра, қобыз аспаптарында ойнаудан сайысып, театр шеберлігі, вокал, би, фотосурет, тележурналистика, қысқа метражды кино, бейнероликтер, бейнелеу өнері, киім дизайны, декоративті-қолданбалы өнер, ым-ишарат тілінде ән айту, диджей, аталымдарында бақ сынайды.
Байқау жеңімпаздары Батыс Қазақстан облысының намысын Қазақстан Республикасының Ұлттық Дельфий ойындарында қорғайтын болады. Ал Ұлттық дельфий ойындарында жеңіс тұғырынан көрінген жастар халықаралық дельфий ойындарында еліміздің атынан өнер көрсетеді.
Қазақстан Ұлттық дельфий ойындарын биыл XIII-рет өткізді. Ойындар жас таланттарды тауып, оларды қолдау, өскелең ұрпақ арасында мәдени мұраны насихаттау, оларға рухани, эстетикалық тәрбие беру, мәдениетаралық диалог пен ұлттық өнердің дамуына ықпал етуді көздейді.
Айта кетейік, дельфий ойындары –қатысушылар арасынан талантты тұлғалар мен ерекше дарынды жастарды іріктеп алуға бағытталған, классикадан бастап қазіргі заманға дейінгі өнердің барлық түрін біріктіретін кешенді байқау. Олимпиада ойындарымен бірге ежелгі Греция жерінде дүниеге келіп, XX-ғасырда қайта жандана бастаған дельфий ойындары бүгінде әлемнің 100-ге тарта мемлекетінде қолдау тапқан.
Тоқтар Ғабдірешұлы
