Қырғыз еліне жолданған жауап нотасында қазақстандық тараптың Қырғыз Республикасының Сыртқы істер министрлігінің әрекетіне қатты таңданыс білдіретіні жазылған. Себебі, «Мемлекет басшысының әртүрлі елдердің көрнекті саяси қайраткерлерімен және саяси партиялардың басшыларымен олардың өтініші бойынша кездесулері тұрақты түрде өткізіліп тұрады және халықаралық тәжірибеге толық сәйкес келеді». Еліміздің Сыртқы істер министрлігінің хабарлауынша, мұндай іс-шаралар ашық, транспарентті сипатта өтіп, бұқаралық ақпарат құралдарында кеңінен жарияланады.
«Мәселен, ү.ж. 14 тамызда Астанада Мемлекет басшысы Қырғыз Республикасының президенттігіне кандидаттардың бірі, бұрынғы Премьер-Министр С. Жээнбековпен осындай екіжақты кездесу өткізді.
Оған қоса, Мемлекет басшысының тұжырымдарын Қырғыз Республикасы Сыртқы істер министрлігінің бұрыс түсіндіруіне түсінбестік білдіреміз. Аталған кездесулер барысында Қазақстан Республикасының Президенті Қырғыз Республикасы президенттігіне қандай да бір нақты үміткердің пайдасына қолдау білдірген жоқ. Оның үстіне Астана және Алматы қалаларында қырғыз өкілдерімен келіссөздер барысында Мемлекет басшысы бауырлас қырғыз халқы сенім білдіріп, сайлайтын Қырғыз Республикасының кез келген Президентімен тиімді өзара іс-қимыл жасауға дайын екенін айтты.
Осыған байланысты Қырғыз Республикасының ішкі ісіне араласуға және ел халқының таңдауына ықпал ету әрекетіне қатысты Қырғыз тарапының ойдан шығарылған тұжырымдарын табанды түрде жоққа шығарамыз.
Қырғыз Республикасы Сыртқы істер министрлігінің мұндай әрекеті Қазақстандық тарап адалдық танытатын, екі халық арасындағы дәстүрлі бауырластық қатынастарға және Қазақстан Республикасы мен Қырғыз Республикасы арасындағы одақтық қарым-қатынастар туралы шартқа түбегейлі қайшы келеді деп санаймыз..», — деп жазылған.
