Алматы облысында «Еңбек жолы» байқауы өтіп жатыр

2017 жылдың маусым айында аудандар мен қалалар арасында "Еңбек жолы" байқауы басталды. Байқау еңбек әулеттері мен кәсіпорын жұмыскерлері арасында өткізіледі.

Наурызбаева Сания
©Алматы облысының коммуникация қызметі

Байқауға Қазақстан экономикасына елеулі еңбек үлесін қосқан ең үздік еңбек әулеттері және меншік нысанына қарамастан барлық кәсіпорын жұмыскерлері қатыса алады. Бұл туралы облыстық өңірлік коммуникациялар қызметі алаңында белгілі болды.

«Аталмыш байқау 1 тамыздан бастап Республикалық деңгейге ұласатын болады. Конкурста «Үздік еңбек әулеті», «Кәсіпорынның жас жұмыскері», «Жұмысшы жастардың үздік жетекшісі» атты үш номинация бар. Жеңімпаздарға әділ қазылардың шешімімен, арнайы сыйлықтар берілетін болады,» — деді Алматы облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Наурызбаева Сания.

Конкурсқа қатысу үшін өтініш жазу, жеке куәліктің және еңбек кітапшасының көшірмесі, тақырыпқа байланысты видеоролик, презентация жасау қажет.

Айта кетейік, «Еңбек жолы» конкурсын өткізудің негізгі мақсаты — жастарды еңбекті қадірлеу рухында тәрибелеу, еңбек өнімділігін ынталандыру, ең үздік еңбек әулеттері мен кәсіпорын жұмысшыларын анықтау, жұмыскерлер кәсіптерін насихаттау, көпжылдық еңбек әулеттері салтын сақтау және арттыру болып табылады.