Бүгінде елде болып жатқан оқиғаларға сарабдал пікірін білдіріп отыратын өз саласына жетік кәсіби сарапшылардың қоғамдық пікір қалыптастырудағы ықпалы кейбір басылымдардан басым тұр. Бұл ретте жасалған арнайы рейтингіміздің оныншы орыны белгілі қаржыгер Айдан Кәрібжановтың еншісінде.
Тоғызыншы орын жуырда ғана «Сакралды Қазақстан» ғылыми-зерттеу орталығы басшылығына келген белгілі саясаттанушы Берік Әбдіғалиұлына бұйырды.
Ақпарат құралдары арқылы да, әлеуметтік желідегі парақшасы арқылы да еліміздің даму үдерісі, қоғамдық-саяси жүйелердің жетілуіне қатысты тұщымды пікірлерін тұрақты білдіріп тұратын және бір салмақты саясаттанушымыз Ерлан Сайыров. Тек сараптама-болжам жасап қана қоймай, қоғамдық жұмыстарға ұйытқы болу арқылы да жаңа бастамалардың жанында жүретін азамат сегізінші орынға тұрақтады.
Ұлттық түйткілдер мен жаһандық геостратегиялық мәселелердің мәйегіне жетік сарапшы — Расул Жұмалы. Қоғамдық пікір қалыптастыруда өзіндік қолтаңбасы бар саясаттанушы жетінші орынға жайғасты.
Отандық саясаттану саласындағы салиқалы есімдердің бірі Гүлмира Илеуоваға алтыншы орын тиді.
Саяси өзгерістер мен демократиялық құндылықтарға қатысты қарымды пікірлерімен көзге түсіп жүрген Марат Шибұтовқа рейтингімізден бесінші орын бұйырды.
Қазақстан экономикасының әлеуеті мен даму барысын жетік білетін жас та болса азулы сарапшы Олжас Құдайбергенов төртінші орынға тұрақтады.
Сарапшылардың ішінде елдегі экономикалық ахуалдың бүге-шүгесін жетік білетін санаулылардың бірі — Рақым Ошақбаев. Салада болып жатқан оқиғаларға бейжай қарай алмайтын, тұрақты түрде терең талдауларымен тамсандырып келе жатқан маманға үшінші орын бұйырды.
Ал, саясаттану саласында білгірлердің бірегейі Досым Сәтбаев болса екінші орынды иеленді.
Белгілі саясаттанушы Айдос Сарым рейтингіміздің төріне жайғасты. Алашшыл азамат ұлттық мәселеден бастап, қазақтың қамына қатысты қоғамдық дүниелерді дер кезінде терең қозғап, сараптап беріп, өз пікірін үнемі білдіріп отырады.
Ержан ҚАЛЫМБАЙ
1. «Рейтинг» деп атауға тұрарлық болса, критерий қандай болды?
2. Фейсбукте белсенділерді саяси эксперт деп атауға қандай негіз болды?
3. Артықшылығын жаздыңдар, кемшілігі қайда? Критическое мышление үшін. Мәселен, аталған кісілерден политологтардың өзі биыл салмақта сараптама мақала жазбады. Көпшілігі ФБ-дағы постпен шектеледі. Әрине, ол аналитикаға еш қатысы жоқ. Ал бизнесмен, экономисттер саяси тақырыптарға жақындаған да жоқ.
4. Сайт жақсы, бірақ контент те сапалы болуы керек. Құрпетпен оқу үшін