Қазақстанда жеке медициналық (санитарлық) кітапшаның электрон форматы енгізілді. Бұл туралы денсаулық сақтау министрлігі хабарлап отыр.
Енді Қазақстан азаматтары медициналық тексеру нәтижелерін және санитарлық кітапшасына қатысты мәліметтерді E-Densaulyk сервисі арқылы eGov mobile мобайл қолданбасынан ала алады. Бұл медициналық тексеруден өту уақытын едәуір қысқартып, терапевтке қайталап бару қажеттігін жояды. Санитарлық кітапша дайын болған кезде азаматтарға 1414 нөмірінен SMS-хабарлама келеді.
Жұмыс берушілер қызметкерлерінің медициналық кітапшаларының өзектілігін hr.enbek.kz еңбек ресурстары порталы арқылы ақысыз тексере алады. Бұл санитарлық нормалардың сақталуын бақылауды жеңілдетіп, мүмкін болатын қателердің алдын алуға көмектеседі.
Денсаулық сақтау министрлігінің мәліметінше, электрон жүйе 15 санаттағы қызметкерлерді қамтиды. Олардың қатарында қоғамдық тамақтану, дәріхана, санаторий қызметкерлері, сонымен қатар қызмет көрсету саласының мамандары мен медицина қызметкерлері бар.
Бұл санаттағы мамандар жылына бір рет немесе алты ай сайын медициналық тексеруден өтуге тиіс. Жеке медициналық кітапшаларды электрон форматқа көшіру арқылы оларды алу және тексеру процесі азаматтар мен жұмыс берушілер үшін оңай әрі жылдам болды, — делінген хабарламада.
