Тәуелсіздік күні Алматыда түрлі мерекелік және ресми іс-шаралар өтеді. Бұл туралы әкімдіктің баспасөз қызметі хабарлап отыр.
16 желтоқсан — Республика алаңында Тәуелсіздік монументіне гүл қойылады. Іс-шараға ардагерлер кеңесінің, қала әкімдігінің, қоғамдық ұйымдардың, этномәдени бірлестіктердің өкілдері және 1986 жылы желтоқсан оқиғасына қатысушылар қатысады.
17 желтоқсан күні — «Тәуелсіздік таңы» ескерткішіне гүл шоқтары қойылады.
Жиналғандар қаза болғандарды бір минут үнсіздікпен еске алып, дін өкілдері марқұмдардың рухына құран бағыштайды.
Сонымен қатар мерекелік іс-шаралар қаланың барлық ауданында өтеді.
Алмалы ауданында 13 желтоқсанда Ten Qogam орталығында және Чайковский атындағы Алматы музыкалық колледжінде Желтоқсан оқиғасына арналған концерттер өтеді.
Бостандық ауданында 15 желтоқсанда сағат 16:00-де аудандық комьюнити орталығында «Тәуелсіздік – мәңгілік елдің тұғыры» тақырыбында дөңгелек үстел өтеді. 16 желтоқсанда сағат 18:00-де Mega Alma-Ata сауда орталығында Нұрғиса Тілендиев атындағы «Отырар сазы» академиялық мемлекеттік фольклорлық-этнографиялық оркестрінің концерті болады.
Медеу ауданында 13 желтоқсанда сағат 11:30-да Б.Момышұлы атындағы №131 мектеп-лицейінде «Бабаларым аңсаған – Тәуелсіздік» атты кездесу өтеді.
Түрксіб ауданында 13 желтоқсанда ауданның Белсенді ұзақ өмір сүру орталығында зейнеткерлерге арналған концерт өтеді. 14 желтоқсанда аудандық комьюнити орталығында Желтоқсан оқиғасына қатысушылар мен жастардың қатысуымен «Ардагерлерді ардақтайық» атты дөңгелек үстел өтеді.
Осы күні Наурызбай ауданында сағат 11:00-де Шұғыла шағын ауданы 347/4 мекенжайындағы Инновациялық шығармашылық орталығында «Тұғыры биік – тәуелсіздік» атты концерт өтеді.
Әуезов ауданында 13 желтоқсанда сағат 11:00-де Алматы технологиялық колледжінің акт залында «Тәуелсіздік тынысың, бүгінгі дәулетің, ертеңгі ырысың» атты концерт өтеді. Сонымен қатар, ауданның комьюнити орталығында Тәуелсіздік күніне арналған флешмоб ұйымдастырылады.
Жетісу ауданында 13 желтоқсан күні сағат 14:00-де №193 мектеп ұжымының қатысуымен мәдениет үйінде «Тәуелсіздік – Тұғырым» атты мерекелік концерт өтеді.
Бұдан бөлек, қаладағы барлық білім беру мекемесінде Желтоқсан оқиғасына арналған ашық сабақтар, конференциялар мен кездесулер өткізіледі.
