Бүгін сенаттың жалпы отырысында «2025–2027 жылдарға арналған республикалық бюджет туралы» заңы қаралды. Сенат заңның жекелеген баптарын жаңа редакцияда ұсынып, оны мәжіліске қайтарды.
Қаржы министрі Мәди Тәкиевтің айтуынша, сенаторлар халықты таза сумен қамтамасыз етуге, газдандыру жүйесін, жылу-электр энергетикасын, көлік, инженерлік-коммуникациялық инфрақұрылымына, сонымен қатар «Ауыл – ел бесігі» жобасын іске асыруға қосымша қаржы бөлуді ұсынды.
Түзетулерді ескере отырып, бюджет шығыстарының негізгі бағыттары қалыптасты. Бюджет өткен жылдардағыдай әлеуметтік бағдарланған болып қала береді. 2025 жылы әлеуметтік саланың шығыстары ағымдағы жылға қарағанда 871 млрд. теңгеге ұлғайып, 9,8 трлн. теңге көлемінде жоспарланып жатыр. Оның бюджет шығыстарындағы үлесі 38% болады, — деді Мәди Тәкиев сенаттың жалпы отырысында.
2025 жылға арналған негізгі шығыстар:
- әлеуметтік қамтамасыз ету және азаматтарға әлеуметтік көмек көрсетуге – 6 трлн. теңге;
- білім беруді дамытуға — 1 трлн. теңге;
- тегін медициналық көмектің кепілдік берілген көлеміне — 1,6 трлн. теңге;
- әлеуметтік медициналық сақтандыру қорына — 675 млрд. теңге, соның ішінде мемлекеттік жарналарға — 668 млрд. теңге;
- туризм мен спортты дамытуға — 141 млрд. теңге;
- мәдениет пен ақпаратты дамытуға — 165 млрд. теңге;
- өңірлерді қолдауға — 7,5трлн. теңге;
- экономиканың нақты секторын дамытуды қолдауға — 2,1 трлн. теңге;
- агроөнеркәсіптік кешенді дамытуға — 635 млрд. теңге;
- көлік саласына — 568 млрд. теңге, соның ішінде автожолдарды дамытуға — 423 млрд.теңге;
- су ресурстарын тиімді басқаруға — 139 млрд. теңге;
- күш құрылымдарына — 2,7 трлн. теңге.
Сенаторлар 2025 жылдағы бюджет шығыстарын 60,0 млрд. теңгеге арттыруды ұсынып отыр. Бұл ақшаны үкімет резервінен алу жоспарланған. Осылайша, жоғары палата 2025-2027 жылдарға арналған республикалық бюджет туралы заңға 135 өзгеріс енгізіп, мәжіліске қайтарды. Төменгі палата қолдаса, заң бірден президентке жіберіледі.
