Елімізде егін ору маусымы аяқталды. Биыл егістің орташа өнімділігі 16 ц/га болды. Бұл туралы ауыл шаруашылығы министрі Айдарбек Сапаров айтты.
Биыл елімізде жалпы егіс алқабы 23,3 млн га болды, оның ішінде 16,7 млн га жерге дәнді-дақыл егілді. Күзгі жауын-шашынға қарамастан, егін шығынсыз орылды. Бүгінде егіс пен дәнді дақылдарды ору аяқталды, қазір жүгері ору жалғасып жатыр. Дәнді-дақылдың 99,7%-і орылды. Биыл егістің орташа өнімділігі 16 ц/га болып, 26,5 млн тонна астық бастырылды. Жоғары өнімділікке қолайлы ауа райы мен агротехнологияларды дұрыс қолдану, яғни сапалы тұқымдарды пайдалану, минералды тыңайтқыштарды енгізу және өсімдіктерді тиімді қорғау арқылы қол жеткізілді, — деді Айдарбек Сапаров үкімет отырысында.
Министрдің айтуынша, биылғы науқанда Қызылорда, Түркістан және Жетісу облыстарында жоғары көлемде егін орылған.
Астық егетін өңірлер арасында ең жоғары өнім ору көрсеткіші Солтүстік Қазақстан облысында тіркелді, мұнда орташа өнімділік 18,6 ц/га болды. Одан кейін Ақмола облысында – 14,1 ц/га, ал Қостанай облысында – 14 ц/га егіс орылды. Бұл өңірлерде агротехникалық іс-шараларды қатаң сақтайтын кіші шаруашылықтардың өздері де орташа деңгейден жоғары өнім алды. Мысалы, Солтүстік Қазақстан облысының Жамбыл ауданындағы «Ақ-Жер 210» шаруа қожалығы 42,5 ц/га бидай орды. Қостанай облысында «Сарыкөл Агро» шаруа қожалығы 40 ц/га өнімге қол жеткізді. Сонымен қатар Ақмола облысының Сандықтау ауданындағы «Свободное» шаруа қожалығы 35 ц/га өнім алды, — дейді ол.
