Алматы әкімі Ерболат Досаев «Кемел» шағынауданындағы Есентай өзеннің бойына салынған апатты көпірді қарап шықты.
Бұл туралы қала әкімдігі хабарлады.
Жолымбет көшесінде орналасқан осы көпір бойынша барлық көліктің қозғалысы оның ақаулы жағдайына байланысты осы жылдың мамыр айының соңында шектелген. Өткен ғасырдың 60-жылдарында салынған көпір құрылымы ешқашан жөнделмеген және жарамсыз болып қалған. Көпір тіректерінде қауіпті жарықтар пайда болды, бетон конструкциялары жартылай бұзылды. Көпірді тексеру барысында көпірге кіреберістерде үйінділердің, сонымен қатар көпірдің беткейлеріндегі топырақтың шөгуі анықталды.
Қала басшысына қалалық мобилділік басқармасының басшысы Сағындық Телібаевтың айтуынша, көпірді техникалық тексеру деформациялық тігістің жоқтығын да анықтады. Мұның бәрі құрылымның жүк көтергіштігіне және оның беріктігіне теріс әсер етеді. Демек, көпірді жөндеу мүмкін емес. Сондықтан жаңасын салу қажет.
Жаңа көпірдің жобасы қадалар негізі бар бір аралықты құрылысты, сонымен қатар көпірге кіреберістердің жүріс бөлігін қайта құруды көздейді. Жаңа құрылым ескіден әлдеқайда үлкен болады. Егер апаттық көпірдің ұзындығы 16,8 метр, ені 8,5 метр және тіректердің биіктігі 7 метр болса, онда жаңа көпірдің ұзындығы 24 метр, ені 13,5 метр, биіктігі 9 метр болады. Бұл көпірден өтуді жолмен бір деңгейде қамтамасыз етуге мүмкіндік береді, — делінген хабарламада.
Жаяу жүргіншілердің жайлылығы мен қауіпсіздігін қамтамасыз ету үшін Ерболат Досаев екі жақтан да тротуарларды жайластыруды, сонымен қатар көпір «Кемел», «Көкжиек» шағын аудандары мен «Қоянқұс», «Ынтымақ», Жаңадәуір, Жаңаталап поселкелері тұрғындары үшін көлік байланысын қамтамасыз ететіндігін ескеріп, қысқа мерзімде жұмыстар жүргізуді тапсырды.
Бұл әлеуметтік маңызы бар нысан, көпір арқылы бірнеше автобус маршруттары, соның ішінде мектеп маршруттары өтеді, сондықтан барынша қысқа мерзімде жол қозғалысының қамтамасыз ету керек. Қажетті қаражат бөлінетін болады, қозғалыс осы жылдың қазан айында ашылуға тиіс. Көпір ондаған жылдар бойы адамдарға қызмет ететіндей сапалы болғаны жөн, — деді Ерболат Досаев.
Қазіргі уақытта жаңа көпір салу бойынша жөндеу жұмыстары аяқталғанға дейін автокөлік иелері аталған учаскені Мұхамеджан Сералин көшесі арқылы айналып өте алады.
