Жайық өзенінің деңгейі Атырау тұсында да төмендей бастады. Бұл туралы облыстың жедел штабы хабарлады.
Баспасөз қызметінің мәліметінше, Жайық өзенінің деңгейі Индер мен Махамбет ауданында күн сайын төмендеп жатыр.
Бүгін, 3 маусымда таңертеңгі сағат 08.00-де Индербор кентіндегі гидробекетте өзен суы 6 сантиметрге төмендеген. Бұл кентте Жайық суының деңгейі 9 метр 29 сантиметр болды. Мұнда қауіпті шек – 845 сантиметр. Демек қауіпті шектен әлі де 84 сантиметрге артық болып тұр, — делінген хабарламада.
Махамбет ауданында да Жайық арнасы бірнеше күн қатарынан төмендеп жатыр. Бүгін су деңгейі 5 сантиметр азайды. Қазір Махамбет ауылының тұсында 10 метр 6 сантиметр болды.
Жайық өзені Атырау аумағында да төмендей бастады. Мұнда бірнеше күн 6 метр деңгейінде сақталып тұрды. Өзен арнасы 1 маусымда кешкі мезгілден бері төмендегені байқалды. Қазір мұнайлы шаһардағы гидробекеттегі су деңгейі – 5 метр 97 сантиметр. Сонымен қатар Жаңаталап және Еркінқала ауылдарында Жайық өзені көтерілген жоқ, — делінген хабарламада.
