«Қазақстан халқына» қорының қолдауымен 20 мың бала тегін демалуға мүмкіндік алады. Бұл туралы оқу-ағарту министрлігі хабарлады.
Ұйымдастыру ісіндегі барлық мәселе тоғыз мемлекеттік органның бірлескен жоспары шеңберінде пысықталып жатыр.
Осы мақсатта республикалық және өңірлік штабтар құрылды. Барлық демалыс орталығының тізімі әзірленіп, олардың дайындығы қамтамасыз етілді.
«Қазақстан халқына» қорының қолдауымен 20 мың бала тегін демалуға мүмкіндік алады. Су тасқынынан зардап шеккен өңірлерден келген оқушыларға, сонымен қатар халықтың әлеуметтік осал топтарынан және ауылдық жерлерден келген көп балалы отбасынан шыққан балаларға басымдық беріледі, — делінген хабарламада.
Жалпы, еліміз бойынша 2,9 миллион бала жазғы демалысты 10 743 демалыс лагерінде өткізеді деп күтілуде: 10 мың – жыл бойы сауықтыру орталықтарында, 240 мың – қала сыртындағы орталықтарда, 2,6 миллион – мектеп жанындағы лагерьлерде, 75 мың – шатырлар мен киіз үйлерде.
Өңірлерде жазғы демалысты ұйымдастыру бойынша бірегей жобалар іске асырылады: «Ұлы Дала кереметі», «Jas galym», «Гастро туризм», «Бір күн қалада», «Қонақжай отбасы» және басқалары, бұл демалысты мазмұнды өткізуге мүмкіндік береді.
Жаз маусымы қарсаңында министрлік 120 мың педагог-ұйымдастырушыны арнайы даярлықтан өткізді. Қосымша 12 мыңнан астам студенттер мен еріктілер тартылады.
