Алматының коммуналдық қызметтері түнімен қар тазалады. Қалада жауған қардың биіктігі 10 см дейін жетті. Бұл туралы Алматы әкімдігі хабарлады.
Алматыда 1 ақпан сағат 22.30-дан басталған қар бүгін түске дейін жауады деп болжанып жатыр. Түнгі уақытта 426 бірлік арнайы техника мен 278 жұмысшы жұмылдырылды. Көктайғақтың алдын алу үшін қар жауғанға дейін негізгі көшелер сұйық реагенттермен өңделді, — делінген хабарламада.
Таңғы сағат 05.00-тен бастап 149 шағын көлемді техниканың көмегімен тротуарлар мен қоғамдық орындарда қар күреліп жатыр. Түнгі уақытта 3,8 мың текше метр шығарылды.
Таңғы сағат 08.00-ден бастап 452 бірлік арнайы техника, оның ішінде 174 шағын көлемді техника мен 1 183 жұмысшы қар күреуге тартылды.
Аудан әкімдіктерінде жұмысты бақылау үшін тәулік бойы кезекшілік ұйымдастырылды.
