Түркістан облысында ауа райының қолайсыздығына байланысты полиция күшейтілген тәртіппен қызмет етіп жатыр. Бұл туралы Polisia.kz хабарлады.
Түркістан облысы аумағында қолайсыз ауа райына байланысты жолдың жабылып, полицияның күшейтілген тәртіппен қызмет етіп жатқанына бүгін екінші күн.
Жол апаттарын болдырмау мен тұрғындардың қауіпсіздігін қамтамасыз ету мақсатында полиция қызметкерлері тәулік бойы республикалық, облыстық маңызы бар жолдарға жұмылдырылды. Мәселен, 1 ақпанда Созақ ауданындағы облыстық маңызы бар Шолаққорған–Ащысай–Кентау жолы мен Жамбыл облысымен шекаралас аумақтағы халықаралық Алматы–Ташкент–Термез жолының 534-593 шақырымы қар мен боранның салдарынан жолдың көрінбеуіне байланысты жабылды, — делінген хабарламада.
Барлық транспорт қозғалысына шектеу қойылып, жолаушылар жылы және қауіпсіз орындарға жеткізіліп жатыр.
Барша азаматтардан жолға шықпауларын сұраймыз! Ұзақ жолға шығу аса қажет болып жатса, көлікті дайындап, көп мөлшерде жанар-жағармаймен қамдап, қосымша сыртқы жылы киімдер мен азық-түлік алуды ұсынамыз. Сонымен қатар міндетті түрде жол қозғалысы ережелерін сақтап, жылдамдықты асырмауға шақырамыз, – дейді полицейлер.