Үкіметте премьер-министр Әлихан Смайыловтың төрағалығымен «Жайлы мектеп» ұлттық жобасын іске асыру барысы қаралды.
Бұл туралы үкіметтің баспасөз қызметі хабарлады.
Кеңеске қатысушылар жаңа білім ордаларын жобалау және салу, оларды заманауи жабдықтармен және жиһазбен жарақтандыру, мемлекеттік сараптама жүргізу, қаржыландыру және басқа да бірқатар мәселені талқылады.
Бүгінгі таңда 217 мектеп бойынша белсенді жұмыс жүріп жатыр. Барлық процесс жобалық басқарудың арнайы ақпараттық жүйесінде бақыланады, онда сонымен қатар нақты уақыт режимінде құрылыс-монтаждау жұмыстарының барысын бақылауға болады, — делінген хабарламада.
Жалпы 2026 жылға дейін ұлттық жоба аясында 740 мың оқушыға арналған жаңа форматтағы 369 мектеп салу көзделген.
Әлихан Смайыловтың айтуынша, уәкілетті мемлекеттік органдар мен ұйымдар жұмыстардың орындалу сапасын мұқият қадағалап, нысандардың бағасын негізсіз көтеруге жол бермеуге тиіс. Мектептерді белгіленген мерзімде тапсыру қажет.
