Алматыда су құбыры желілерін салуды аяқтау үшін 28 қазаннан 30 қазанға дейін Бұрындай тасжолында қозғалыс шектеледі.
Бұл туралы Алматы энергетика және сумен жабдықтау басқармасы хабарлады.
Алатау ауданында Барыс көшесінен Жаужүрек көшесіне дейін екі жаққа да көлік қозғалысы шектеледі. Асфальтбетон жабынын қалпына келтіру кезінде қауіпсіздікті қамтамасыз ету үшін уақытша шектеу енгізіледі. Осылайша, 3,8 шақырым су құбыры желілерін және 4,6 шақырым кәріз желілерін салу аяқталады. Бұл Алатау ауданының 2,5 мың тұрғынын қамтиды, олар үздіксіз орталық сумен жабдықтауға қосылады. Ал бұрын олар жеке компанияның қызметін пайдаланған, — делінген хабарламада.
Басқарманың мәліметінше, биыл 20 нысан бойынша 108,4 километр су құбыры және кәріз желілерін (81,1 километр су құбыры және 27,3 километр кәріз) салу жоспарланған, бұл халықтың орталықтандырылған сумен жабдықтауға қолжетімдігін 99,2%-ке дейін арттыруға мүмкіндік береді.
