Университет оқытушыларының жалақысы көтерілуі мүмкін. Бұл туралы парламент мәжілісінің әлеуметтік-мәдени даму комитетінің басшысы Асхат Аймағамбетов әлеуметтік желідегі пара»қшасында хабарлады.
Ол комитет депутаттары республикалық бюджет жобасына ЖОО оқытушыларының жалақысын көтеруге қатысты түзету енгізгенін айтып өтті.
Әлеуметтік-мәдени даму комитеті университет оқытушыларының жалақысын көтеру бойынша республикалық бюджеттің жобасына арнайы түзетулерді ұсынды. Мемлекет басшысы ЖОО-лардың профессор оқытушылық құрамының жалақысын көтеру бойынша үкіметке бірнеше рет тапсырма беріп еді. Оқытушыларлың жалақысын арттыру үшін, бюджеттен әр грантқа бөлінетін қаражат көлемін көбейту керек, — деп жазды Асхат Аймағамбетов.
Сондықтан, түзетулерімізге байланысты комитеттің депутаттары магистратурада оқу бойынша бюджеттен университеттерге төленетін гранттың құнын еселеп көбейтуді, ал бакалавриаттың соммасын тиісті пайызға өсіру бойынша қаражат бөлу туралы нақты ұсынысты заң жобасына берген.
Аталған шешімдер бойынша соңғы нүкте мәжілістің жалпы отырысында қойылады. Бұл қадамдар оқытушылардың жалақысын 40%-ке дейін көтеруге мүмкіндік береді, — деді Асхат Аймағамбетов.