Алматыда Mudarabah Capital қаржы пирамидасын ұйымдастырушыларға сот үкімі шықты. Сот қаулысымен Мейіржан Төребаев пен Мейірхан Шерниязов бес жылға бас бостандығынан айырылды.
Мейіржан Төребаев пен Мейірхан Шерниязовтан басқа сотталушылардың бәрі қылмыстық кодекстің екі бабы бойынша кінәлі деп танылды. Олар 217-бап — «қаржы пирамидасын құру және басқару» мен 262-бап — «ұйымдасқан топ, қылмыстық ұйым құру және басқару» бойынша жауапқа тартылады.
Мейіржан Төребаев пен Мейірхан Шерниязов тек 217-бап бойынша кінәлі деп танылды. Сот үкімімен күдіктілерге бас бостандығынан айырудың түрлі мерзімдері тағайындалды.
«Мейіржан Төребаевқа ең төменгі қауіпсіздік колониясында бес жыл бас бостандығынан айыру жазасы тағайындалсын. Мейірхан Шерниязов ең төменгі қауіпсіздік колониясында бес жыл жазасын өтесін», – делінген сот үкімінде.
Еске салайық, қазақстандық танымал вайнерлер Мейіржан Төребаев пен Мейірхан Шерниязов биыл сәуірде Mudarabah Capital қаржы пирамидасы схемасына қатысы бар деген айыппен қамауға алынған болатын.
