Алматының Наурызбай ауданында 500 келушіге арналған екі жаңа емхана мен бір дәрігерлік амбулатория салынады.
Бұл туралы қала әкімі Ерболат Досаев тұрғындармен кездесуде айтты.
Құрамыс шағынауданындағы бірінші емхана бойынша жобалау-сметалық құжаттамасы әзірленіп жатыр. Қазан айында мемлекеттік сараптаманың оң қорытындысын аламыз деп ойлаймын. Қаржының бөлінуіне қарай құрылысты 2024 жылдың I-ші тоқсанында бастауды жоспарлап отырмыз, — деді әкім.
Сонымен қатар ол екінші емхана бойынша Шұғыла шағынауданында жобалау ұйымымен шарт жасалғанын айтты.
Биылғы IV-ші тоқсанда мемлекеттік сараптаманың оң қорытындысын алу көзделіп отыр, құрылыс 2024 жылғы көктемде басталады. Бұған қоса, Ақжар шағынауданындағы 200 орындық дәрігерлік амбулатория бойынша жобалау-сметалық құжаттама әзірленіп жатыр. Құрылыс шамамен 2024 жылдың II-ші тоқсанында басталады,- деді Ерболат Досаев.
