Мемлекет басшысының жарлығымен Әлібек Қуантыров ҚР ұлттық экономика министрі лауазымына тағайындалды. Бұл туралы Ақорда хабарлады.
2005 — 2006 жылдары Томск мемлекеттік университетін «Қаржы және кредит» және «Лингвистика және мәдениетаралық коммуникация» мамандықтары бойынша тәмәмдаған.
2008 — 2010 жылдары Мичиган университетін «Қолданбалы экономика магистрі» дәрежесімен «Болашақ» халықаралық стипендиясы бойынша тәмамдаған.
Президент жастар кадр резервінің мүшесі. Қазақ, ағылшын, испан, неміс және орыс тілдерін жетік меңгерген. DipPIFR (ХҚЕС) «Кәсіби есепші» сертификаты бар. «Ерен еңбегі үшін» және бірнеше мерейтойлық медальдармен марапатталды.
2005 жылғы қыркүйек айынан бастап 2006 жылғы ақпан айына дейін экономика және бюджеттік жоспарлау министрлігі ішкі әкімшілік департаменті, халықаралық қатынастар департаментінің жетекші маманы ретінде қызмет атқарған.
2007 жылы Жапонияның қаржы министрлігінде экономикалық саясат бойынша екі айлық тағылымдамадан өткен.
2006 жылғы ақпан айынан бастап 2010 жылғы қазан айына дейін экономика және бюджеттік жоспарлау министрлігі инвестициялық саясат және жоспарлау департаментінің сарапшысы және экономикалық даму және сауда министрлігі аталған департаментінің бас сарапшысы болып жұмыс істеген.
2010 жылы экономикалық даму және сауда министрлігінің стратегиялық жоспарлау және талдау департаменті стратегиялық әзірлемелер басқармасының бастығы қызметін атқарған.
2010 — 2013 жылдары қаржы министрлігінің бюджет саясаты және жоспарлау департаменті, бюджеттік жоспарлау және болжамдау департаменті директорының орынбасары болып жұмыс атқарған.
2013 жылы индустрия және жаңа технологиялар министрлігі геология және жер қойнауын пайдалану комитеті төрағасының орынбасары лауазымында жұмыс істеген.
2013 — 2019 жылдары президент әкімшілігінің стратегиялық әзірлемелер және талдау орталығы меңгерушісінің орынбасары, әлеуметтік-экономикалық мониторинг бөлімі меңгерушісінің орынбасары қызметінде жұмыс атқарған.
2019 — 2021 жылдары тұңғыш президент – Елбасы кеңсесі бөлім меңгерушісінің орынбасары қызметінде жұмыс атқарған.
2021- 2022 жылдары ұлттық экономика вице-министрі лауазымында жұмыс атқарған.
2022 жылы ұлттық экономика министрі болып тағайындалды.
