Президент экология министріне сөгіс жариялады

Мемлекет басшысы Қасым-Жомарт Тоқаев киік санын реттеу мәселесін шуға айналдырған экология, геология және табиғи ресурстар министрі Серікқали Брекешевке сөгіс жариялады.

Киік популяциясының одан арғы тағдыры төңірегінде түсініксіз әуре-сарсаңға салып, пікірталас тудырғаны үшін сөгіс жариялаймын. Мұның бәрін осындай қоғамдық талқылау деңгейіне шығарудың қандай қажеті бар еді?! Бұл мәселеге кәсіби тұрғыдан қарау керек. Ұлтымыздың менталитетін ескеру қажет, — деді Тоқаев үкіметтің кеңейтілген отырысында.

Президент киік қазақтар үшін қасиетті жануар екенін атап өтті.

Табиғи ландшафтан 80 мың киікті өлтіру мәселесі жайлы айтылып отыр. Бірақ мұның басқа да әдістері бар. Мамандармен ақылдасыңыздар, бұл енді соңғы шара ғой. Бұл шараны қолдануға тура келетін шығар, оны жоққа шығармаймын. Бірақ қайталап айтамын, бұл соңғы шара, — деді мемлекет басшысы.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз