Қаржы пирамидасын жарнамалағандар жазаланады

Парламент мәжілісінде қаржы пирамидаларының қызметіне қарсы іс-қимыл туралы заң жобалары мақұлданды.

ҚР кейбір заңнамалық актілеріне қаржы нарығы мен қаржы ұйымдарын мемлекеттік реттеуді, бақылау мен қадағалауды күшейту және қаржылық (инвестициялық) пирамидалардың қызметіне қарсы іс-қимыл мәселелері бойынша өзгерістер мен толықтырулар енгізу туралы» және «ҚР әкімшілік құқық бұзушылық туралы кодексіне қаржылық (инвестициялық) пирамидалардың қызметіне қарсы іс-қимыл мәселелері бойынша толықтыру енгізу туралы» заң жобаларын ҚР парламенті мәжілісінің депутаты Юрий Ли таныстырды.

Қарауға ұсынылған заң жобаларының негізгі мақсаты – қолданыстағы заңнамадағы құқықтық олқылықтарды жою және қаржылық (инвестициялық) пирамидаларды құру және жарнамалау үшін жауапкершілікті қатаңдату арқылы алаяқтық қаржы пирамидаларының кеңінен таралуына депутаттардың жедел ден қоюы болып отыр, — деді Юрий Ли.

Парламент мәжілісінің депутаты аталған заң жобаларының қандай өзгерістер ұсынатынын түсіндірді:

  • қаржы (инвестициялық) пирамидаларын құру және басқару үшін санкциялардың жоғарғы шегін арттыру;
  • қаржы (инвестициялық) пирамидаларын жарнамалағаны үшін қылмыстық жауапкершілікті белгілеу;
  • сотқа дейінгі тергеп-тексеруді бастаған ішкі істер органдарына немесе экономикалық тергеу қызметіне қаржылық (инвестициялық) пирамидаларды жарнамалау туралы қылмыстық істер бойынша тергеу жасауын айқындау;
  • қылмыстық іс-әрекеттерді әкімшілік құқықбұзушылықтардан ажырату;
  • жеке және заңды тұлғалардың ақшасы мен өзге де мүлкін осындай қызметті жүзеге асыруға құқығы жоқ тұлғалардың пайдасына тартуға қатысты қызметті жарнамалауға тыйым салу.

Түзетулер қылмыстық кодекске, қылмыстық іс жүргізу кодексіне, әкімшілік құқықбұзушылықтар туралы кодекске және «Жарнама туралы» заңға қатысты болады.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз