Қазақстанда машина жасау саласында 20-дан астам жоба іске асырылады

Премьер-министр Әлихан Смайылов машина жасау саласын одан әрі дамыту мәселелері жөнінде кеңес өткізді. Бұл туралы үкіметтің ресми сайты хабарлады.

Индустрия және инфрақұрылымдық даму вице-министрі Марат Қарабаев, «Қазақстан машина жасаушылар одағы» ЗТБ басқарма төрағасы Мейрам Пішембаев, «Қазэнергокабель» АҚ бас директоры Владимир Бобров және «Локомотив құрастыру зауыты» АҚ президенті Марат Тілеубаев баяндама жасады.

Машина жасау саласында 3 мыңға жуық кәсіпорын бар, 115 мың адам жұмыспен қамтылған. Өңдеу өнеркәсібі өндірісінің жалпы көлемінде (16,8 триллион теңге) машина жасауға 14% тиесілі. Саланың ең ірі секторларының бірі — автомобиль жасау – 33,1%.

Алдағы жылдары елімізде құрастырылатын автомобильдердің модельдік қатарын кеңейту, сонымен қатар автокомпоненттер (бамперлер, орындықтар, автомобиль шынысы, пластиктен жасалған бөлшектер, шиналар, т. б) өндірісін ретке келтіру жоспарланып отыр.

Кеңес барысында саланың өзекті мәселелері де қаралды. Мәселен бүгінгі таңда Қазақстанда т/ж және электротехникалық машина жасау салаларында аккредиттелген зертханалар жоқ, сонымен қатар кабельдік-өткізгіш өнімдер бойынша ұлттық стандартты әзірлеу қажет.

Фото: ҚР үкіметінің ресми сайты

Бұған қоса, ауыл шаруашылығы техникасын шығару саласында өндірістің толық тізбегін құру үшін кәсіпорындар арасындағы кооперацияны реттеген жөн, ал жер қойнауын пайдаланушылардың сатып алу процесі бойынша ел ішіндегі құндылығын арттыру үшін шаралар қабылдау қажет.

Сонымен қатар саланың импортты алмастыру есебінен айтарлықтай өсуге әлеуеті бар екені атап өтілді, сол себепті тиісті бағдарлама шеңберінде 20-дан астам жобаны іске асыру көзделген. Машина жасауды дамытудың қосымша шаралары ретінде базалық өндірістер құру (болат импортын азайту) және жұмыс істеп тұрған кәсіпорындарды шикізатпен қамтамасыз ету, өнеркәсіпті дамыту қорын қаржыландыруды кеңейту жоспарланып отыр.

Премьер-министр қысқа мерзімде әрбір мәселе бойынша қажетті шараларды дайындау үшін барлық айтылған ұсыныстарды пысықтауды тапсырды.

Машина жасау саласы – экономиканың қарқынды дамып келе жатқан секторы. Импортты алмастыру, әсіресе аймақтық нарықтарға экспортты кеңейтуде орасан зор әлеует бар. Осы орайда біз аталған саланың серпінді дамуына жағдай жасап, қажетті қолдау шараларын іске асыруға тиіспіз, — деді Әлихан Смайылов.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз