Өткен аптада Nur Otan-ның XXI тарихи cъезінде тұңғыш президент – Елбасы Нұрсұлтан Әбішұлы Назарбаевтың бастамасымен мемлекет басшысы Қасым-Жомарт Кемелұлы Тоқаев бірауыздан партия төрағасы болып сайланды. Елбасы айтқандай, «біздің еліміз жаһандық трансформация, күрделі және жауапты шешімдер дәуіріне қадам басты. Олардың табысты болуы саяси ерік-жігерге, айқын мақсаттарға және ең бастысы, халықтың қолдауына байланысты болады. Барлық қажетті ресурсқа ие Nur Otan партиясы мемлекет басшысының бағытын іске асыруда сенімді көмекші болуға тиіс». Съезде ел президенті, Nur Otan партиясының жаңадан сайланған төрағасы Қасым-Жомарт Кемелұлы Тоқаев партияны реформалау, жұмыстың әдістері мен мазмұнын жаңарту, партиялық бақылауды күшейту, қоғамдық қабылдаулардың тиімділігін арттыру, кадрлық әлеуетті нығайту, сонымен қатар жаңа формациядағы адамдарды тарту жөнінде нақты міндеттер қойды, — деп жазды ол.
Бауыржан Байбектің айтуынша, Қасым-Жомарт Тоқаев белгілеген жүйелі реформаларға кең ауқымды қоғамдық-саяси қолдауды қамтамасыз ету үшін бұл күні Nur Otan-да қажеттінің барлығы, яғни адамдар, тәжірибе, ресурстар және инфрақұрылым бар.
Nur Otan алдына жаңа көзқарастар мен тәсілдерді талап ететін мүлде жаңа міндеттер қойылды. Сондықтан мен партия төрағасы Қасым-Жомарт Кемелұлы Тоқаевқа атқарып отырған қызметімнен босату туралы тиісті өтініш бердім. Бүгін менің өтінішім қанағаттандырылды. Мен мемлекеттік және партиялық қызметте 20 жылдан астам еңбек еттім: екі рет, жалпы алғанда 6 жылға жуық – Nur Otan төрағасының бірінші орынбасары, 3 жылға жуық – президент әкімшілігі басшысының орынбасары лауазымдарында, 4 жыл Алматы әкімі болып жұмыс істедім. Қандай қызмет атқарсам да, қай салаға жауапты болсам да, мен әрқашан Отанымыздың Тәуелсіздігін нығайтуға, қоғамда ішкі саяси тұрақтылық пен келісімді қамтамасыз етуге, ел азаматтарының әл-ауқатын арттыруға өзімнің үлесімді қосуға тырыстым. Өз жұмысымда ашықтық және жауапкершілік қағидаларын басшылыққа алдым. Ар-намыс, сөзге беріктік және іске адалдық деген ұғымдар мен үшін әрқашан бірінші орында болды, — делінген Бауыржан Байбектің жазбасында.
Ол сонымен бірге жұмыстың бәрін атқаруда өзіне зор сенім білдіргені үшін Нұрсұлтан Назарбаевқа, мемлекет басшысы, Nur Otan партиясының төрағасы Қасым-Жомарт Тоқаевқа осы жылдары жан-жақты қолдау көрсеткені үшін алғыс айтты.
Партия аппаратының қызметкерлеріне, сонымен бірге орталықтағы және жергілікті жерлердегі барлық партия мүшелеріне ерекше алғыс білдіремін. Олар – жауапкершілікті өз мойнына алудан қорықпайтын іскер жандар, Қазақстанның болашағы үшін күн сайын қажырлы еңбек ететін нағыз патриоттар. Сіздермен бірге жұмыс істеу мен үшін үлкен мәртебе болды! Сөз соңында айтарым, еліміз үшін осы тағдыршешті кезеңде әрбір азамат өзінің көзқарасы мен сеніміне қарамастан мемлекет басшысының айналасына топтасып, тәуелсіз Қазақстанның гүлденуі мен біздің балаларымыздың лайықты болашағы үшін маңызды әлеуметтік-экономикалық және саяси реформалар бағытын қолдауға тиіс деп санаймын! Nur Otan бұл жұмысқа өз үлесін қоса алатынына кәміл сенемін, — деп түйіндеді Бауыржан Байбек.
Айта кетейік, бүгін, 2 қаңтарда президент Қасым-Жомарт Тоқаев Бауыржан Байбекке Nur Otan партиясы төрағасының бірінші орынбасары лауазымындағы көп жылғы жұмысы үшін алғыс айтты.
Еске салайық, Бауыржан Байбек Nur Otan партиясы төрағасының бірінші орынбасары қызметіне 2019 жылдың маусымында тағайындалған еді.
