Египеттегі қазақстандық туристер елге қай күндері қайта алады?

Air Astana Шарм-эль-Шейхтен Қазақстанға 3 желтоқсаннан бастап жеті репатриациялық рейс орындауды жоспарлап отыр.

Бұл туралы әуекомпанияның баспасөз қызметі хабарлады.

Шарм-эль-Шейх — Алматы бағыты бойынша ұшулар 3, 5, 6, 8 желтоқсанда жүзеге асырылады. Ал Шарм-эль-Шейх — Нұр-Сұлтан бағыты бойынша рейс 3, 4, 7 желтоқсанда орындалады. Осы рейстерге адам көп келмеген жағдайда репатриациялық рейстер саны қысқартылуы мүмкін.

Қазір Air Astana әуе компаниясы 8 желтоқсанға дейін Египеттен Қазақстанға 1 300-ден аса қазақстандық жолаушыны шығаруды жоспарлап отыр. 3 желтоқсанда және одан кейін рейстерге брондаған жолаушылардың билет құнын толық өтетуге құқы бар, — делінген хабарламада.

Еске салайық, Ведомствоаралық комиссия 3 желтоқсаннан бастап жаңа шектеу шараларын, соның ішінде Египетпен әуе қатынасын тоқтата тұру туралы шешім шығарды. Мұндай шараны қабылдауға коронавирустың жаңа «омикрон» штамы себеп болды.

Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз