Серікқали Брекешев экология министрі болып тағайындалды

Қазақстан президенті Қасым-Жомарт Тоқаевтың жарлығымен Серікқали Брекешевті экология, геология және табиғи ресурстар министрі қызметіне тағайындалды.

Бұл туралы Ақорданың баспасөз қызметі хабарлады.

Серікқали Аманғалиұлы Брекешев Қазақстан Республикасының Экология, геология және табиғи ресурстар министрі лауазымына тағайындалсын, – делінген жарлықта.

Серікқали Брекешев 1972 жылы 14 қазанда Павлодар қаласында туған. 1995 жылы Атырау политехникалық институтын “Мұнай және газ кен орындарын игеру”мамандығы бойынша бітірген.

Ол 1995-1997 жылдары “Қазақстан-Ресей сауда үйі” БК, бас директордың орынбасары, экономисті болды.

1997 жылы Ақтаудағы Салық бөлімінің инспектор қызметін атқарды.

1997-1998 жылдары “Маңғыстаумұнайгаз” акционерлік қоғамы “Мұнайгермес” материалдық-техникалық қамтамасыз ету және өнімді өткізу басқармасының филиалы, 8-ші разрядты инженер болды.

1998-2006 жылдары “Қарақұдықмұнай” ЖАҚ, мұнай өндіру жөніндегі мастер, пайдалану жөніндегі инженер, кәсіпшілік менеджері болып жұмыс істеді.

2007-2014 жылдары энергетика және минералдық ресурстар, мұнай және газ министрліктерінде басшылық қызметтер атқарған.

2015-2020 жылдары “ҚазТрансГаз” акционерлік қоғам құрылымында  ГТЖ басқару жөніндегі басқарушы директоры, техникалық саясат жөніндегі басқарушы директоры, өндірістік-техникалық департаментінің директоры, бас директордың техникалық саясат жөніндегі орынбасары.

2020 жылдың 5 наурызынан бастап экология, геология және табиғи ресурстар вице-министрі қызметін атқарды.

Айта кетейік, кеше, 9 қыркүйекте бұрынғы экология, геология және табиғи ресурстар министрі Мағзұм Мырзағалиев энергетика министрі лауазымына келді.