Бүгін облыс әкімі Гүлшара Әбдіқалықова Қызылорда қаласы әкімдігінде өткен актив жиынында жаңа қала әкімін таныстырды.
Қазақстан Республикасы Президенті әкімшілігі мен Қызылорда қалалық мәслихатының келісімдері бойынша облыс әкімінің 2021 жылдың 8 сәуірдегі өкімімен Қызылорда қаласының әкімі лауазымына Ғанибек Қазантаев тағайындалды, – делінген хабарламада.
Бұған дейін Нұрлыбек Нәлібаев Қызылорда әкімі қызметінен кеткені туралы хабарланған еді. Енді ол Премьер-министр кеңсесінің Өңірлік даму бөлімінің меңгерушісі.
Ғанибек Қазантаев 1960 жыл Қызылорда облысы Шиелі ауданында дүниеге келген. Жамбыл гидромелиоративтік құрылыс институтын инженер құрылысшы, Қорқыт Ата атындағы Қызылорда мемлекеттік университетін мұнай-газ кен орындарының инженері мамандығы бойынша тәмамдаған.
Еңбек жолын 1980 жылы Жалағаш ауданында жылжымалы механикаландырылған колоннаның мастері болып бастады.
1981-1983 жылдары Кеңес әскері қатарында болды.
1983-1992 жылдары Қызылорда облысындағы құрылыс мекемелерінде мастер, өндіріс-техникалық бөлімінің бастығы, бас инженер болып қызмет атқарды.
1992-2013 жылдың 30 маусымына дейін “Нефтегаз строй Кызылорда” корпорациясының президенті, “АйДан” ЖШС-гі атқарушы директоры, “Ақмешіт” АҚ президенті, “Сырдария мұнай” АҚ Бас директоры, “Транснефтьсервис” БК” ЖШС-нің Бас директоры болды.
2007 жылдан 2013 жылға дейін “Kazpetrol Group” ЖШС-нің атқарушы директоры қызметін атқарды.
2013 – 2019 жылы Сырдария ауданының әкімі лауазымында болды.
2019 жылдың қазан айынан бастап Энергетика министрлігінің Мұнай-газ кешеніндегі мемлекеттік инспекциясының оңтүстік өңіраралық басқарма басшысы қызметіне келді.