Президент “Теңізшевройл” бас директорына табысты жұмысы үшін алғыс айтты

Қазақстан президенті "Теңізшевройл" ЖШС-ның бас директоры Имер Боннерді қабылдады.

Ақорданың баспасөз қызметінің хабарлауынша, Имер Боннер Қасым-Жомарт Тоқаев “Теңізшевройл” компаниясының өндіріс орындары мен “Теңіз” кенішіндегі короновирус инфекциясына қарсы күрес жұмыстары жайында баяндады.

Кездесуде көмірсутегі секторындағы инвестиция жобаларының жүзеге асырылуы және компанияның алдағы 3-4 жылдағы даму перспективалары туралы айтылды.

Мемлекет басшысы “Теңізшевройл” компаниясы іске асырып жатқан жобаларда қазақстандық үлесті қамтамасыз етудің маңызды екеніне назар аударды.

Кездесу соңында Қасым-Жомарт Тоқаев Имер Боннерге Қазақстанның мұнай-газ саласының дамуына қосқан үлесі және компаниядағы табысты жұмысы үшін ризашылығын білдірді.