Мемлекет 2020 жылы игерілмей қалған гранттарды қайта бөлді

Мемлекет 2020-2021 оқу жылына деп бөлген, бірақ игерілмей қалған гранттарды қайта қарады. Бұған дейін мемлекеттік грантпен оқуға түсе алмаған 3 000 мектеп бітіруші енді ақысыз білім алады.

Бұл туралы Ұлттық тестілеу орталығының директоры Дидар Смағұлов әлеуметтік желідегі парақшаларында хабарлады.

Тәуелсіздік күніне орай қазақстандық 3 000 отбасыға арналған керемет жаңалық! 2020-2021 оқу жылына арналған жоғары білім беру гранттарын конкурстық тағайындаудан кейін игерілмей қалған (бакалавр) гранттарды қайтадан бөлдік, – деп жазды Дидар Смағұлов Instagram-да.

Тізімді мына сілтемеден көруге болады.

Еске салайық, 2020-2021 оқу жылдарына бөлінген білім гранты иегерлерінің тізімі 15 тамызда жарияланды. 6 қыркүйекте тағы 4 000 бала қосымша жоғары білім беру грантын иеленді. Мемлекет биылғы оқу жылында 36 жоғары оқу орнына грант бөлмеді.