Күшейтілген карантин: Қазақстан азаматтары 42 500 теңге алады

Үкімет мұқтаж жандарға шілде айына 42 500 теңге төлейді. Бұл туралы Қасым-Жомарт Тоқаев Twitter-дегі парақшасында хабарлады.

Қазір жағдайдың реттеле бастағанының алғашқы нышандары байқалады. Ахуалды толық тұрақтандыру үшін алдағы екі аптаның маңызы зор. Мұқтаж жандарға Үкімет шілде айына 42 500 теңге төлейді, — деп жазды Қасым-Жомарт Тоқаев.

Бұған дейін Еңбек және халықты әлеуметтік қорғау министрі Біржан Нұрымбетов Қазақстан азаматтарына 42 500 теңге төленбейтінін хабарлаған еді.

Айта кетейік, коронавирус инфекциясының таралуына байланысты енгізілген төтенше жағдай режимі салдарынан табыссыз қалған Қазақстан азаматтары 42 500 теңге көлемінде әлеуметтік төлем алды. Бұл — Қазақстандағы ең төменгі жалақы. Қазақстанда төтенше жағдай режимі 15 наурызда енгізіліп, 11 мамырда аяқталды.