Қызылорда облысы әкімі баспасөз қызметінің хабарлауынша, «Абзал және Компания» толық Серіктестігінің «Элита» бренді күріші Ресей, Қырғызстан, Әзербайжан, Түркменстан, Моңғолия, Ауғанстан, Украина, Тәжікстан және ТМД-ның басқа да елдеріне экспортталады. Кәсіпорын «күріш сапасы» стандарты бойынша ақталған ұсақ күріш өндіреді.
Аймақта сыр маржанын өндейтін ірі зауыттың бірі — Қызылордада орналасқан «Абай Дәулет» серіктестігі. Кореяның қазіргі технолгиясымен жабдықталған кәсіпорынның қуаттығы — сағатына 7-10 тонна. Шығарылған өнімнің 60%-і экспортқа жіберіледі, — делінген хабарламада.
Айта кетейік, Қызылорда облысындағы тамақ өндірісінің 50%-і күріш өңдеумен байланысты. Облыста өндірілетін салыны да жаңа технологиямен өңдеу жұмыстары жүйелі жолға қойылған. Мысалы, облыс аумағында 45 ірі және 29 кіші зауыт жұмыс істейді. Оның 27-і халықаралық стандарқа сай. Бүгінгі күні барлық кәсіпорынның жылдық қуаттығы — 408,5 мың тонна. Өңірде ауылшаруашылығы саласы бойынша өнім өндіру осы жылдың өткен кезеңімен салыстырғанда екі есе өскен. Экспорт көлемі 31% ұлғайған.
