Жарлық мазмұны Ақорда сайтында жарияланды:
Қазақстан Республикасы Конституциясының 44-бабының 2) тармақшасына, «Қазақстан Республикасындағы сайлау туралы» 1995 жылғы 28 қыркүйектегі Қазақстан Республикасы Конституциялық заңының 69 бабына сәйкес Қазақстан Республикасы Парламенті Сенатының депутаттары өкілеттіктерінің конституциялық мерзімінің 2020 жылғы қазан айында аяқталатынына байланысты ҚАУЛЫ ЕТЕМІН:
- Қазақстан Республикасы Парламенті Сенаты депутаттарын сайлау 2020 жылғы 12 тамызға тағайындалсын.
- Қазақстан Республикасының Үкіметі, Нұр-Сұлтан, Алматы және Шымкент қалаларының, облыстардың әкімдері Қазақстан Республикасы Парламенті Сенаты депутаттарының сайлауын ұйымдастырушылық, материалдық-техникалық және қаржылық қамтамасыз ету жөнінде шаралар қабылдасын.
- Осы жарлық жарияланған күнінен бастап қолданысқа енгізіледі.
Сенатқа өңірлердегі мәслихат депутаттары екі адамнан сайлайды. Тағы 15 адамды Президент тағайындайды. Сенат депутаттарының өкілеті — 6 жыл. Палатаның мәслихаттар сайлаған 34 мүшеcінің жартысы 3 жылдан соң қайта сайланады.
