Еліміздегі санитариялық-эпидемиологиялық жағдай туралы Денсаулық сақтау министрі Елжан Біртанов, карантин жағдайында өңірлердегі шектеу шараларын одан әрі жеңілдету жөніндегі ұсыныстар туралы Премьер-министрдің орынбасары Ералы Тоғжанов баяндады.
Мемлекеттік комиссия өңір әкімдерінің ұсынысын қарап, Денсаулық сақтау министрлігінің позициясы бойынша бірнеше шешім шығарды:
- 4 мамырдан бастап барлық өңірде жұмысқа кірісетін кәсіпкерлік субъектілерінің қызмет түрлерінің тізімі бекітілді, олар:
- азық-түліктен басқа тауар сататын ауданы 500 шаршы метрден аспайтын дүкендер сағат 17.00-ге дейін;
- фотосалондар, гүл сататын дүңгіршектер;
- шаштараздар (жазылу бойынша);
- медицина орталықтары (жазылу бойынша);
- стоматология клиникалары (жазылу бойынша);
- жылжымайтын мүлік операцияларын жасайтын компаниялар, жарнама агенттіктері, адвокаттар, нотариустар;
- шағын қаржы ұйымдары, сақтандыру компаниялары, ломбардтар, айырбастау пункттері;
- ақпарат-коммуникация технологиялары компаниялары.
- 4 мамырдан бастап далада спортпен шұғылданып, жаттығу жасауға рұқсат етіледі.
- 4 мамырдан бастап Нұр-Сұлтан мен Алматыдан Қызылордаға, Петропавлға, Өскеменге және Семейге әуе қатынастары жанданады. Рейстерде санитария талабы нормаларын күшейтіледі, салонға аз жолаушы алынады және олар бір-бірінен алшақ отырғызылады.
Өңір әкімдіктеріне тиісті шараларды қолға алып, жұмысқа кірісетін нысандарда санитария-эпидемиология қауіпсіздігін қатаң бақылау тапсырылды.
Отырысқа қатысушылар төтенше жағдай кезінде ірі инвестиция жобаларын іске асыру, сыртқы сауда операцияларын жүргізу сияқты мәселелерді де талқылады.
