Төтенше жағдай жөніндегі мемлекеттік комиссияның шұғыл штабының хабарлауынша, көз жұмған азамат 30 наурызда «екіжақты пневмония» диагнозымен жұқпалы аурулар ауруханасына өте ауыр жағдайда жатқызылған. Жасы 62-де, нотариус болып жұмыс істеген. Ауырып жатқанда дәрігерлер көмегіне жүгінбеген. Науқасқа белгіленген қауіпсіздік хаттамасы бойынша бар көмек берілді.
Өкінішке қарай, дәрігерлер науқастың өмірін сақтап қала алмады. Ол сағат 07.00-де қайтыс болды. Науқаспен байланыста болған барлық адам анықталды. Олар жабық карантинге орналастырылады, — делінген шұғыл штабтың Telegram-каналында.
Қазір Қарағандыдағы стационарларда коронавирус жұқтырған 13 адам ем алып жатыр. Дәрігерлер науқастардың жағдайы бірқалыпты және қанағаттанарлық екенін айтты. Қарағанды облысында 598 адам тәулік бойы бақылауда, 1 076 адам үйдегі карантинде жатыр.
Қазіргі мәлімет бойынша коронавирус инфекциясынан қайтыс болғандар саны үшеуге жетіп отыр. Бәрі — жасы 50-ден асқан адамдар. Бұған дейін Нұр-Сұлтандағы ауруханада емделген Ақмола облысының 64 жастағы тұрғыны және Нұр-Сұлтанда тұратын 50 жастағы азамат қайтыс болғаны хабарланған еді.
