Қызмет ал да, бағала: кері байланыс пен мәселені шешу тетігі

Қазақстан халық үніне құлақ асу бойынша нақты қадамдар жасап келеді. Тұжырымдаманың мәні тұрғындармен тиімді қарым-қатынас орнатуға негізделген. Мемлекеттік орган мен қызмет алушының арасындағы кері байланыс қордаланып қалған мәселелерді шешіп қана қоймай, оларды болдырмауға да мүмкіндік береді. 

Халықты жұмыспен қамту орталығы

Осы мақсатта ҚР Еңбек және халықты әлеуметтік қорғау министрлігі Дүниежүзілік банктің қаржылай және техникалық қолдауымен “Еңбек машықтарын дамыту және жұмыс орындарын ынталандыру” жобасы аясында кері байланыс және мәселені шешу механизмін жасап шығарды. Қазіргі уақытта бұл механизм тұрғындарды жұмыспен қамту орталықтарында қолданылып жатыр және шағым мен арыз беру процесінің ашық, есебінің тура болуын қамтамасыз етіп отыр. КБМШТ құралдарының бірі  – 2020 жылдың қаңтар айынан бастап 203 жұмыспен қамту орталығы мен 168 оқу орталығының қызмет алушыларының қолдануына ұсынылған арнайы мобайл қосымша.

Отандық жүйе өндірушілер жасап шығарған Digital Аgent (Цифрлық агент) қосымшасы қазақстандықтарға пікірін ашық айтып, мемлекеттік қызметтерге баға беруге, қызмет көрсетушіден фидбек алуға мүмкіндік береді.

Министрлік халықпен өзара тиімді қарым-қатынас жасау жолында үздіксіз жұмыс істеп келеді. Бізге жобаларымыз бен көрсетіп отырған қызметтеріміз жөнінде азаматтармен кері байланыс құру өте маңызды. Қызмет көрсету сапасы жөнінде кері байланыс жасау бойынша жұмыспен қамту орталықтарында «Кері байланыс және мәселелерді шешу тетігі» жобасы жұмыс істеп жатыр. Осы жоба аясында қазақстандықтар Digital Аgent қосымшасын пайдалану арқылы жылдам пікір қалдырады, тіпті шағым түсіре алады. Жұмыспен қамту орталығы 5 минут ішінде азаматқа хабарласып, түскен шағымды қанағаттандыруға кірісіп кетуі керек, – дейді Еңбек және халықты әлеуметтік қорғау вице-министрі Нариман Мұқышев.

Күн сайын жұмыспен қамту орталықтарының қызметіне жүз мыңдаған қазақстандық жүгінеді. Онда жұмыссыздарға өзінің әлеуметтік мәртебесін ресми тіркеп, жұмыс табуға көмектеседі. Ал жұмыс берушілерге талабына сәйкес қызметкерлер таңдап береді. Бұл – жұмыспен қамтуға белсенді түрде көмек беруді және жұмыссыздықтан әлеуметтік қорғауды жүзеге асыратын мемлекеттік орган. Орталықтар бос жұмыс орны мен түйіндеменің ең ірі базасына қол жеткізуге мүмкіндік беріп қана қоймай, кәсіптік бағдар беру, кәсіптік оқыту бойынша қызметтер де көрсетеді. Бұл жерден “Еңбек” нәтижелі жұмыспен қамтуды және жаппай кәсіпкерлікті дамыту бағдарламасының мүмкіндіктері туралы толық ақпарат алуға болады.

Халық басқа да мемлекеттік органдарындағы сияқты жұмыспен қамту орталықтарының да қызмет көрсету сапасына шағымданып жатады. Ал қазір олар шағымына жауап алатынына сенімді бола алады. Бұл үшін көп күш салудың қажеті жоқ. Ұзын-сонар кезекке, қызметкерлердің дөрекелігіне, артық бюрократия немесе жай ғана қандай да бір қызметті алу сапасын жақсарту және жеңілдету сияқты мәселелердің барлығына лезде шағым түсіре алады.

Халықты жұмыспен қамту орталығы
Фото: Inform.kz

Пікірді шынайы уақыт режимінде қалдыруға болады. Мемлекеттік органның жұмысы 5 балдық шкала бойынша ғана емес, бұған қоса қызметкердің сыпайылығы, кәсіби деңгейі, күту ұзақтығы, мүмкіндігі шектеулі жандарға жасалған жағдайлар сияқты тағы басқа критерийлер бойынша бағаланады.

Нарыққа шығатын кез келген өнімде кері байланыс тетігі болуы керек. Мына жағдайда өнім дегеніміз – мемлекеттік қызметтер. Ал нарық – сол қызметтерді тұтынатын халық. Мемлекет олардың шағымына назар аударуы тиіс. Бірақ мәселелер әбден қордаланып қалған кезде емес, оларды жылдам шешу үшін соңғы инстанцияға жетуін күтпей, сол арада, яғни 5 минуттың ішінде қолға алуы керек, – дейді жоба авторы Мирус Құрмашев.

Digital Agent қосымшасының көмегімен мемлекеттік орган Қазақстанның барлық өңірі бойынша шағымдарды есептеп, статистика шығарады. 2020 жылдың басынан бері цифрлық агент арқылы жұмыспен қамту орталықтарына 250-ден астам шағым келіп түскен. Тұтастай алғанда кері байланыс және мәселелерді шешу тетігі шағымдар мен арыздарды қарау уақытын айтарлықтай азайтуға бағытталып отыр.