Елде барлығы 295 500 заңды тұлға тіркелген. Әйелдер басқаратын компаниялардың үлесі — шамамен 30%. Бұл туралы Finprom.kz мамандарының зерттеуінде айтылады.
Әйел басшылардың көбі жеке кәсіпорындарды басқаратын болып шықты. Мұндай кәсіпорындардың саны биылғы 9 айда 76 100 болды, яғни 11,4% көбейді. Әйелдер көп басқаратын екінші құрылым — мемлекетке қарасты кәсіпорындар. Олардың саны 10 800, былтырғыдан 0,7% азайған.
Әйел басшылары бар үшінші негізгі құрылым — шетел кәсіпорындары. Әйелдер басқаратын шетел кәсіпорындарының саны — 3 200, көрсеткіш бір жылда 3,3% азайған.
Қазақстанда 87 600 шағын кәсіпорынға, 2 100 орта кәсіпорынға, 428 ірі кәсіпорынға әйелдер басшылық етеді. Мұндай шағын кәсіпорындардың саны биылғы 9 айда 8,7% артқан (еліміздегі барлық шағын кәсіпорынның 30,1%-і), әйелдер басқаратын орта кәсіпорындардың саны 1,8% артқан (барлық орта кәсіпорынның 35,4%-і), әйелдер басқаратын ірі кәсіпорындар саны 1,4% артқан (барлық ірі кәсіпорынның 18,1%-і).
Әйел басшылары бар кәсіпорындардың 64,3%-і немесе 13 938-і білім беру саласында. Finprom.kz сарапшыларының зерттеуіне қарағанда, білім беру әйел басшылардың саны ерлерден асып түсетін жалғыз сала болып отыр.
Әйелдер басқаратын кәсіпорны көп екінші сала — денсаулық сақтау және әлеуметтік қызмет: 48% немесе 2 821 кәсіпорын. Әйел басшылары бар кәсіпорындардың 42,1%-і немесе 2 569-ы қаржы және сақтандыру саласында.
Әйел басшылары өте аз салалар тау-кен өнеркәсібі (12,5%), электрмен қамту, газ, бу беру және кондициялау (14,7%), сонымен бірге ауыл, орман және балық шаруашылығы (15,3%) болып отыр.
(Иллюстрация: Dribbble.com ©Ilya Sedykh)