“Ауыл – ел бесігі” жобасы 7 миллион адамның тұрмысын түзейді

Жоба аясында ауылдарда барлығы 30 мыңнан астам инфрақұрылым салынады.

Ауыл, балалар, асық
Фото: Рафхат Халелов

Алдағы 7 жыл ішінде “Ауыл – ел бесігі” жобасын іске асыру ауылда тұратын 7 миллион адамның тұрмысын жақсартады. Бұл туралы бүгін Премьер-министр Асқар Маминнің төрағалығымен өткен Үкімет отырысында осы жобаны іске асыру барысы қаралған кезде айтылды.

Үкіметтің баспасөз қызметінің хабарлауынша, “Ауыл – ел бесігі” жобасын іске асыру Нұрсұлтан Назарбаевтың 2019 жылғы 27 ақпанда Nur Otan партиясының XVIII съезінде берген тапсырмасы бойынша басталды. Оның мақсаты – ауылдық жерлерде өмір сүру сапасын жақсарту, ауылдық аумақтардың инфрақұрылымын жаңғырту, оларды өңірлік стандарттар жүйесінің параметрлеріне келтіру.

Жаңа әдістеме бойынша 3 477 перспективалы ауыл іріктелді, онда 6,6 миллион адам немесе ауыл халқының 85%-і тұрады. Жобаға бөлінетін қаражат 2027 жылға дейін 900 миллиард теңгеге дейін арттырылады, ауылдық жерлерді дамытуға бағытталған басқа мемлекеттік бағдарламалардан қаржы ауыстырылады, сөйтіп оны іске асыруға барлығы 2 триллион теңге жұмсалады, жоба аясында барлығы 30 мыңнан астам іс тындырылады.

Асқар Маминнің айтуынша, жобаны іске асыру аясында 7 жыл ішінде ауылдардың барлық инфрақұрылымын жаңарту, 7 мың шақырымнан астам жол салу, ауыл көшелерін салу мен жөндеу, инженер желілерін салу, ауылдарға 100% сапалы ауызсу беру, білім беру, денсаулық сақтау, мәдениет, спорт объектілерін реконструкциялау мен салу және 130 мың жаңа жұмыс орнын құру қарастырылып отыр. Соның арқасында Үкімет 7 миллионға жуық ауыл тұрғынының тұрмыс сапасын жақсартпақ.

Премьер-министр жоба қамтитын ауылдар тізімін қайта қарауды, осы жылдың соңына дейін 2020-2026 жылдарға арналған жаңартылған “Ауыл – ел бесігі” жобасын дайындауды тапсырды. Жобаға қажет қаражаттың 70%-і республикалық бюджеттен  бөлінеді. Қалғанын облыс әкімдіктері басқа қаражат көздерімен бірлесе табуы керек.